Beograd, 27 maj 2012, NOA - Drejtori menaxhues për Evropën dhe Azinë Qendrore në Shërbimin Evropian të Punëve të Jashtme, Mirosllav Lajçak i ka tri kushte Serbisë, të cilat duhet të përmbushen nga Serbia për të marrë datën e negociatave për anëtarësim në BE, deri në fund të vitit.

Por, ministri i Jashtëm serb Vuk Jeremiç i cilësoi kushtet të papranueshme, bëjnë me dije mediat serbe të cilat nënvizojnë se Jeremiç është takuar me Lajçak.

Duke cituar burime brenda takimeve, mediat në Beograd shkruajnë se njëri nga kushtet ka të bëjë me heqjen e strukturave paralele serbe në veri të Kosovës, ndërsa tjetri me heqjen dorë nga politika “Edhe Evropa, edhe Kosova”, citon RTK.

Sipas mediave zyrtarët në Beograd i kanë refuzuar kërkesat.

Autoritetet serbe këmbëngulin në politikën “Edhe Evropa, edhe Kosova”, duke thënë se do të ndjekin edhe rrugën e integrimit, por edhe të “sovranitetit mbi Kosovën”. Gjermania, kohë më parë, i ka kërkuar Beogradit të heqë dorë nga institucionet paralele në veri të Kosovës, si kusht për të avancuar në rrugën e integrimeve evropiane.