Transmetuar më 01-10-2022, 11:05

Një stuhi goditi Sicilinë, midis provincave të Palermos dhe Agrigento, shkruajnë mediat italiane.

Bëhet e ditur se një autobus është përmbysur përgjatë autostradës shtetërore 624, por asnjë nga të plagosurit nuk është në gjendje të rëndë.

Ndërkohë dëshmitarët në vendin e ngjarjes kanë thënë se kishin përjetuar momente terrori dhe menjëherë telefonuan anëtarët e familjes për t’i qetësuar.

Shoferi i autobusit, i cili u përmbys papritur për shkak të furisë së erës dhe lumit me ujë e baltë që përmbyti rrugën, tha se nuk kishte parë kurrë diçka të tillë.

Mediat italiane shkruajnë se moti i keq po shkakton dëme dhe përmbytje në Corleone, Contessa, Entellina, Santa Margherita Belice, Sambuca di Sicilia dhe Poggioreale.

Dhjetëra ekipe të zjarrfikësve ndodhen në terren. Sipas dëshmitarëve situata në zonë është dramatike.

Moti i keq goditi gjithashtu Trapanin dhe qyteti u godit nga një stuhi uji dhe ere.

Uji ka pushtuar disa bodrume dhe dyqane, ndërsa dhjetëra rrugë të pakalueshme dhe disa makina kanë mbetur të bllokuara. Rruga provinciale Immacolatella – Erice është e paarritshme.

Situata midis provincave të Palermos dhe Agrigento është dramatike, e konfirmuar për ANSA edhe nga kryebashkiakët e Sambuca di Sicilia, Leo Ciaccio dhe Contessa Entellina, Leonardo Spera, dy nga komunat e goditura nga moti i keq, të cilët janë në kontakt të vazhdueshëm me civilët.