Teheran- Nuk ndalet dhuna në Iran. Ka shkuar në 57 numri i të vdekurve në protestat për vdekjen e 22-vjeçares Mahsa Amini.

Organizata e Iranit për të Drejtat e Njeriut ka publikuar shifrat, ndërsa ka theksuar se numri mund të jetë dhe më i lartë, për shkak se me kufizimin e përdorimit të internetit, është bërë e vështirë identifikimi i një shifre të saktë.

Ndërkohë, deri më tani autoritetet kanë raportuar për 41 persona të vdekur. Protestat në Iran janë duke u mbajtur për 10 ditë me radhë, pasi 22-vjeçarja Mahsa Amini u shpall e vdekur, teksa ka qenë në mbajtje të Policisë për Moral, e cila ka ndalur gruan me arsyetimin se nuk e ka vendosur si duhet mbulesën në kokë.

Zyrtarët kanë thënë se Amini ka vdekur nga sulmi në zemër, mirëpo familjarët e saj, dhe disa grupe për të drejta të njeriut, kanë hedhur poshtë këto supozime, duke thënë se ajo ka pasur shëndet të mirë.

Sipas tyre, gruaja është rrahur sa ka qenë në mbajtje. Në disa postime në rrjetet sociale, familjarët e personave të vrarë nëpër protesta, kanë thënë se autoritetet u kanë lëshuar certifikatat e vdekjes me arsyetimin se ata kanë pasur sëmundje të ndryshme. Disa të tjerë kanë thënë se autoritetet u kanë bërë presion që të varrosin familjarët e tyre brenda natës, për të fshehur atë që ka ndodhur. Aplikacionet sikurse WhatsApp, Instagram dhe Skype janë bllokuar ditëve të fundit në Iran.

Qasja në internet është kufizuar përtej niveleve të normales, ka thënë grupi që monitoron faqet në internet, NetBlocks. Megjithatë, videot e protestave nga Irani vazhdojnë të publikohen përmes kanaleve tjera, dhe zyrtarë të sigurisë shihen duke sulmuar turmat me armë zjarri