TIRANË- Ndahet nga jeta aktori i dashur shqiptar Enea Zhegu.

Djaloshi që luajti personazhin e famshëm në filmin "Tomka dhe shokët e tij", u shua në moshën 57 vjeç.

Enea, i dashur për të gjithë miqtë e shokët e tij, i admiruar nga artdashësit shqiptarë mbylli sytë përgjithmonë pasi vuante nga një sëmundje e rëndë.

Enea Zhegu luajti në disa filma dhe ishte më i kërkuari nga regjisorët e kinostudios "Shqipëria e Re".

Roli i tij i paharruar ishte ‘Tomka dhe shokët e tij’.

Enea Zhegu

Aktori Ledio Lako, me anë të një postimi në rrjetet sociale ka njoftuar ndarjen nga jeta të Zhegut.

"Lamtumire miku im. Aktor që të patën zili breza të tërë aktorësh! U rritëm me rolet e tua. U prehsh ne paqe Enea Zhegu! (Tomka)".

Ilir Çumani ka shkruar në një postim në Facebook se sëmundja e mundonte aktorin prej vitesh me radhë.

“Sa e trishtë është kjo ikja jote prej turravrapi në këtë fundpranvere o Artist i lindur, Enea Zhegu…! E luajte edhe dramën e ikjes pa kthim, njësoj si tek personazhet e roleve në filmat e tu aq të mrekullueshëm, kaq mbresëlënës, të cilat do të mbeten përgjithmonë të gjalla në kujtesën e publikut, të paharruara për të gjitha brezat.

Ti ike duke bashkëudhëtuar në heshtje për vite me radhë, në një betejë me dhimbjen që të shkaktonte sëmundja tekanjoze e kapricioze, por asnjëherë dhe në asnjë çast nuk e lëshove veten, sepse jetove si qëndrestar stoik në përballje me atë flamë që pak nga pak kafshonte pjesë nga trupi yt vital…!

Shpesh i padrejtë dhe i pamëshirë tregohet fati me njeriun, por ti i shpërfille të dyja këto, sepse dite të ishe sfidant okatar dhe jetove si një artist i pazakontë deri sa dhe frymën e fundit… Por, e trishtë gjithsesi mbetet kjo ikja jote për të gjithë të afërmit, miqtë dhe adhuruesit e tu që i kishe pafund, kudo nëpër Shqipëri…. Lamtumirë Ena…. Pusho në Paqen tënde qetësinë e merituar…! R.I.P”, shkruan ai.

Enea Zhegu u lind më 9 korrik 1964 dhe mbaroi studimet në Institutin e Lartë të Arteve për aktor.

Ai e filloi veprimtarinë e tij kinematografike në filmin shqiptar që në moshë 12-vjeçare, duke u angazhuar nga regjisori i mirënjohur Dhimiter Anagnosti, për të interpretuar në filmin “Lulëkuqet mbi mure” në vitin 1976, ku interpretoi me shumë sukses rolin e Lelos.

Një vit më pas, 1977 spikati me rolin e Zigurit në filmin “Njeriu me top” dhe veçanërisht shkëlqeu me atë të Tomkës në “Tomka dhe shokët e tij”, rol i cili e bëri edhe më shumë të njohur dhe e identifikonte tek artdashësit.

Në vitin 1986 interpretoi përsëri një rol kryesor në filmin “Një jetë më shumë”, i cili do të ishte dhe roli i tij i fundit dhe shkëputja nga kinematografia shqiptare.

Shpirti i lirë dhe paksa rebel që ishte krijuar pak e nga pak brenda tij, nisi të nxjerrë krye më shumë në vitet e gjimnazit. Aq sa emri Enea Zhegu do të regjistrohej pothuajse në regjistrat e të gjitha gjimnazeve të Tiranës.

Sapo përjashtohej nga njëra shkollë, e dërgonin tek një tjetër, derisa do të përfundonte në shkollën e natës. Shumëkush vazhdonte ta identifikonte si Tomkën djaloshi plangprishës.

Atje në Akademi, do të ndodhte mrekullia që nuk do të zgjaste shumë. Sepse që në vitin e parë, Enea Zhegu do të përjashtohej sërish nga shkolla për “sjellje të këqija”. Dënimi i parë që mori ishte vetëm për një vit shkollor. Ndërsa në vitin e dytë, një tjetër dënim që do të merrte, po për sjellje jo të mirë, do ta përjashtonte përfundimisht.

Në vitin 1989 e mbyllin për 15 ditë në psikiatri e më pas qëndron i mbyllur për herë të dytë rreth një muaj. Në vitin 1990 emigron në Greqi e pas disa viteve në Itali.

Në ditët e para të kthimit në Tiranë, do të shkonte në Akademinë e Arteve sepse donte që ta niste aty ku edhe u shkëput vite të shkuara.

Megjithatë në vitin 2013, regjisori Besnik Bisha e afron në stafin e serialit “Millenium”, duke luajtur një rol kryesor së bashku me aktorin e mirënjohur Ndriçim Xhepa.