Arrestohet Klodian Kola, 27-vjeçari që shoqëronte Elidon Bashën, i cili mbeti i vrarë mbrëmjen e djeshme në Bulqizë.

U pretendua më herët se 22-vjeçarin Elidon Basha mund ta ketë vrarë pa dashje me çifte shoku i tij, pasi kishin dalë për gjah, por policia ka gjetur armën automatike me të cilën është vrarë i riu.

Policia ka mundur të gjejë përveç kallashnikovit, dhe disa armë të tjera.

Shoku i tij Klodian Kola 27 vjeç deri tani mbetet i dyshuari kryesor i krimit.

Sipas policisë ngjarja ka ndodhur nga pakujdesia, megjithatë do të jenë hetimet e mëtejshme të prokurorisë ato që të përcaktojnë rrethanat dhe motivin e ngjarjes. Po procedohet edhe prindërit e 27-vjeçarit lidhur me armët si dhe faktin se kanë qenë në dijeni të ngjarjes, por nuk njoftuan policinë.

Reagimi i plotë i Policisë së Shtetit:  

Zbardhet dhe dokumentohet ngjarja e ndodhur mbrëmjen e djeshme në Fushë Bulqizë.

Vihet në pranga 27- vjeçari për vrasje nga pakujdesia.

Procedohen penalisht edhe prindërit e tij për veprime që pengojnë zbulimin e së vërtetës.

Gjendet dhe sekuestrohet arma e zjarrit kallashnikov, me të cilën autori i dyshuar , nga pakujdesia plagosi me pasojë vdekjen 22- vjeçarin.

Strukturat Hetimore të Drejtorisë Vendore të Policisë Dibër, në bashkëpunim me ato të Komisariatit të Policisë Bulqizë, nën drejtimin e Prokurorisë së Rrethit Gjyqësor Dibër, falë veprimeve të shpejta profesionale dhe hetimore bënë të mundur zbardhjen e ngjarjes së ndodhur në rrugën Fushë- Bulqizë –Kodër Dane, ku humbi jetën 22 -vjeçari E.B.

Si rezultat i veprimeve hetimore u bë e mundur gjetja e armës së zjarrit tip ‘Kallashnikov’, me të cilën autori nga pakujdesia plagosi me pasojë vdekjen 22- vjeçarin, ngjarje e ndodhur në vendin e quajtur Fusha e Peladhisë, në afërsi të ish Repartit Ushtarak , vend në të cilin kishin shkuar për gjueti.

Gjithashtu u gjetën dhe u sekuestruan në cilësinë e provës materiale motomjeti me të cilin kishin lëvizur për gjueti, një armë gjahu , një kallashnikov, një pushkë sportive, një gjerdan me fishekë, një elektrik dore si dhe rrobat me njolla gjaku që autori kishte veshur në momentin e ngjarjes.

Në vijim të veprimeve u bë arrestimi në flagrancë i shtetasit K. K., 27 vjeç, lindur dhe banues Fushë Bulqizë.

Gjithashtu janë proceduar penalisht prindërit e autorit të dyshuar konkretisht shtetasit H.K., e M.K., pasi autori së bashku me prindërit kanë kryer veprime që pengojnë zbulimin e së vërtetës dhe konkretisht kanë fshehur motorin me të cilin ka lëvizur i arrestuari dhe viktima, kanë fshehur robat me njolla gjaku të cilat mbante veshur autori, në momentin e ngjarjes, si dhe kanë çmontuar e pastruar armën e gjahut të cilën i arrestuari e ka patur në momentin e ngjarjes.

Materialet hetimore në ngarkim të autorit të dyshuar dhe prindërve të tij i kaluan Prokurorisë për veprime të mëtejshme për veprat penale në ngarkim të shtetasit K.K, " Vrasja nga pakujdesia", "Armëmbajtje pa leje","Prodhimi dhe mbajta pa leje e armë të gjuetisë", "Drejtimi i mjetit në mënyrë të pa rregullt", dhe ndaj prindërve të tij për veprën penale "Veprime që pengojnë zbardhjen e së vërtetës"./a.m/NOA.al