Ministri i Brendshëm, Sandër Lleshaj, reagon pasi ish-deputeti demokrat Enkelejd Alibeaj paralajmëroi padi penale për të dhe zyrtarë të tjerë, duke i akuzuar për manipulim me listat e votuesve.

Lleshaj thotë se përfaqësues të Partisë Demokratike dhe media të caktuara nën ndikim, vijojnë të mashtrojnë hapur opinionin publik, duke trilluar operacione imagjinare për kinse “pengimin e qytetarëve për të votuar” nga ana e qeverisë.

Ministri deklaron se në respekt të qytetarëve, që janë të detyruar të dëgjojnë në mënyrë të përsëritur këto trillime haluçinante dhe të papërgjegjshme, i duhet të përsëris publikisht se:

Asnjë ndryshim nuk po ndodh, nuk do të ndodhë dhe nuk mund të ndodhë me qendrat e votimit; Ekstrakti i parë i listave të votuesve do të publikohet më datën 5 tetor dhe çdokush do të ketë mundësinë që të shohë se qendrat e votimit nuk ndryshohen; Ngatërrimi diabolik i procesit të përditësimit apo saktësimit të adresave të qytetarëve, që kryhet në zbatim të ligjit, nuk ka asnjë lidhje me qendrat e votimit të tyre, të cilat nuk ndryshojnë për zgjedhjet e ardhshme parlamentare.

Për vëmendjen e “zëdhënësve të PD”, ai shton se nëse duan të bëjnë kallëzime, le të shkojnë në Prokurori.

“Paralajmërimet tuaja se do të bëni kallëzime janë qesharake, edhe pse në të vërtetë i bëni me qëllim presioni publik dhe intimidimi. Mos u lodhni kot me paralajmërime, thjesht shkoni në prokurori. Nëse doni të ndërtoni ndonjë alibi për rezultatin e zgjedhjeve të ardhshme, mendohuni për diçka tjetër. Kjo e qendrave të votimit është thjesht një blof i dobët. Unë nuk jam si ju, ndaj as nuk më shkojnë ndërmend të bëj ato gjëra që ju aludoni dhe që i keni bërë në mënyrë sistematike vetë, kur, për fat të keq të vendit, kishit pushtetin qeverisës. Jo të gjithë janë si ju dhe, për rrjedhojë, jo të gjithë mund të bëjnë ato që ju keni bërë apo që jeni të gatshëm të bëni, po të keni mundësi”, thotë Lleshaj.

Ministri shprehet krenar që, bashkë me stafet e ekspertëve, është arritur që të bëhen me adresë rreth 300 mijë qytetarë, për të cilët thotë se PD i kishte lënë si nomadë, pa kurrfarë adrese, vetëm me një kod absurd 999 në vend të saj, “të cilin e keni keqpërdorur sa herë keni dashur. Nëse shqetësoheni prej kësaj, shprehuni, por amullia juaj e preferuar nuk mund të mbijetojë përjetësisht”.

Lleshaj i fton demokratët që përpara se t’u referohen platformave mediatike nën dyshim publik, duhet të mundohen të informohen pranë institucioneve zyrtare, duke thënë se aty do të gjejnë të vërtetën e plotë. /a.y/noa.al

“Skemë manipulimi me listat e votuesve”, PD pati për Lleshaj dhe zyrtarë të tjerë