Gjiganti i teknologjisë Samsung po anulon parapagimet për modelin më të ri të smartfonit të palosshëm.
Rimbursimi i klientëve do të bëhet pasi Samsung Galaxy Fold nuk është ende gati të hidhet në treg për përdoruesit për shkak të problemeve që ka shfaqur.
Samsung njoftoi lancimin e smartfonit të ri në shkurt, por përdoruesit që testuan telefonin raportuan se gjatë përdorimit ai kishte pësuar thyerje.
Kjo detyroi kompaninë që të tërheqë modelin e ri, duke pranuar se ka nevojë për përmirësime të mëtejshme.
Samsung deklaroi se do të përforconte mbrojtjen e ekranit në mënyrë që klientët të përfitojnë maksimumin nga smartfoni i ri me vlerë 2 mijë dollarë, i cili u mendua të ishte fillimisht i aksesueshëm për përdoruesit në Shtetet e Bashkuara të Amerikës.
Modeli i smartfonëve të palosshëm përfaqëson edhe gjeneratën e ardhshme të telefonave inteligjentë.
Ndërkohë që Samsung anuloi shitjet, Huawei ka disa muaj që shet Mate X, i njëjtë me Galaxy Fold. Po ashtu kompani të ndryshme aziatike kanë nxjerrë në shitje telefona të ngjashëm por me çmime shumë më të lira.