Transmetuar më 15-06-2019, 21:26

Gjatë një takimi elektoral, kryeministri Edi Rama tha sot se Partia Demokratike është katandisur më keq se ç’ka qenë.

Para vendimit për çeljen e negociatave për Shqipërinë, Rama tha për PD se “atyre ua ka fajin mendja”.

Duke folur nga Kolonja, Rama thë për Bashën se është një njeri llafazan, dembel dhe gjumash.

Kreu i Partisë Demokratike, Lulzim Basha i ka kthyer përgjigje ku shprehet se 30 qershori do të jetë “varreza politike” e Edi Ramës.

Nëpërmjet një reagimi në Facebook, Basha shkruan se Rama është shoku i Avdylajve dhe bandave të krimit.

Shqiptarët sipas Bashës janë ngritur në këmbë në betejën kombëtare për Shqipërinë si gjithë Europa.

Sipas Bashës është koha për Shqipërinë e të gjithë shqiptarëve.

“30 qershori është varreza politike e Edi Ramës, shokut të avdylajve dhe bandave të krimit. Shqiptarët janë ngritur në këmbë në betejën kombëtare për Shqipërinë si gjithë Europa. Boll më me Shqipërinë që duan vetëm ata! Tani është koha për Shqipërinë e të gjithë shqiptarëve! Asnjë hap pas”, shkruan Basha.

Gjithashtu Rama ka “thumbuar” edhe Monika Kryemadhin ku tha për të se “Fallxhorja që e njeh gjithë Shqipëria sesa e shenjtë është, udhëheq një parti dhe bën miting me mallkime”.

Kryetarja e Lëvizjes Socialiste për Integrim, i është përgjigjur “thumbimeve” të Ramës

përmes një statusi në “Facebook”, ku shkruan se “kryeministri ka ngritur një sistem të pastër kriminal”.

Kryemadhi thotë se ky regjim i Ramës, si Chikago në vitet 20, ka përçarë shqiptarët.

Kryemadhi paralajmëron se kush ka tentuar të përçajë shqiptarët ka pasur fund të hidhur.

“Edi sa keq më vjen për ty. Je bërë si Kizi dikur. Merr nëpër gojë, shan e pështyn këdo, që të fanepset në ëndrra dhe të prish rehatinë e pushtetit tënd kriminal. Ed, mos u merr me filxhanë, kazanë apo tepsi, por dil e shpjegoju shqiptarëve disa të vërteta të mëdha, që do të ndjekin gjithë jetën. Ndoshta për fat të keq edhe pas saj. Shpjegoju shqiptarëve si e ke vënë shtetin ne shërbim te krimit. Dhe jo vetëm për trafiqet e drogës, pastrimin e parave, por për atë që të është bërë hall shumë i madh dhe nuk të lë as të flesh. Përdorimin e policisë dhe prokurorisë në shërbim të ca bandave, që blejnë votat për ty, kundër disa bandave të tjera. Asgjë më pak se në Chicago e viteve 20 të shekullit të kaluar. Këtu e ke çuar shtetin e shqiptarëve. Shpjegoju shqiptareve si ka mundësi që 500 milion euro PPP, të rrugëve Balldren-Milot dhe rrugën e Arbërit, ua jep dajë e nip. Dy koncesionet me korruptive, jo në Shqipëri, por besoj në të gjithë Botën. Shpjegoju shqiptareve kush do i paguajë 140 milion eurot e humbura me Becchettin për hir të tekave të tua dhe për t’i shërbyer pronarëve të megafonëve të çjerrë të propagandës tënde. Dhe kjo vlerë sa vjen e rritet nga interesat dhe gjyqet e tjera, që do të pasojnë. Tregoju shqiptarëve sa para po ju merr nga xhepat e tyre, për hir të pushtetit tënd të kriminalizuar. Shpjegoju shqiptarëve si ka mundësi që zgjerimi i një rruge me 3 metra e gjatësi 14 km kushton 70 milion euro. Një koncesion tjetër famëkeq ai i Orikum-Dukat. Shpjegoju shqiptarëve, si për hir të pushtetit tënd dhe lidhjeve të tua me kriminelet, po i lë jashtë nga ëndrra e tyre për një Shqipëri në BE. Shpjegoju si po i shkatërron fermerët dhe blegtorët nga urrejtja, përbuzja dhe përçmimi qe ke për ta, sa edhe subvencionet ja ke ulur deri ne 6 herë. Shpjegoju prindërve të familjeve shqiptare, si po ua bën jetën ferr të rinjve shqiptare, që të vetmen dëshirë dhe ëndërr që kanë, është të ikin sa më parë nga vendi i tyre. Edi, harroje se kriminelë dhe me dhunën e policisë do nënshtrosh shqiptarët në betejën e tyre për zgjedhje te lira dhe të ndershme. Hiqe nga mendje që mund t’i nëpërkëmbësh shqiptarëve, aspiratën e tyre, që në ,90, për një Shqipëri si gjithë Evropa. Edi lëri shfaqet si arushi Silva, por hapi rrugën zgjedhjeve të lira dhe të ndershme. Mjaft u përpoqe të përçash shqiptaret, t’i kundërvësh ata kundër njëri-tjetrit, vëllain kundër vëllait, motrën kundër motrës, prindërit kundër fëmijëve, komshiun kundër komshiut, për të vetmin qëllim të mbash pushtetin tënd në shërbim te oligarkëve të oborrit tënd dhe banditëve, pjesëtarë të tavolinave të tua të natës. Edi, kam edhe një këshille për ty. Hiq dorë nga mbjellja e përçarjes mes shqiptareve, se kush është munduar ta bëjë ka korrur një fund të tmerrshëm”, shkruan Kryemadhi./a.k/noa.al/