Pak ditë para mbylljes se vitit shkollor nxënësit kanë nisur fshirjen e shënimeve nga tekstet shkollore për ti dorëzuar ato me 13 qershor.
Komisioni në nivel shkolle do të vlerësojë gjendjen e librave shkollore nëse ato do të ripërdoren për vitin e ardhshëm apo jo.
Por ndryshe nga çfarë u paralajmërua në nisje të vitit shkollor, se çdo libër i dëmtuar do të paguhet nga prindërit në përfundim të shkollës nuk do të ndodhë kështu.
Specialisti i Politikave dhe i Strategjive në Arsim Besnik Rama ka sqaruar në një intervistë për RTSH-në se prinderit nuk do të paguajnë për librat të cilat nuk janë mirëmbajtur.
Fëmijët shprehen se janë përpjekur të tregohen të kujdesshëm me librat, por ndonjëherë u ka ndodhur t’i dëmtojnë edhe pa dashje.
Ndërsa gjyshërit thonë se në fshirjen e librave kanë asistuar edhe ata. Disa prej tyre nuk e fshehën dëshirën për t’i blerë librat me qëllin që nipërit të kenë mundësi t’i rikthehen atyre kur ta shikonin të nevojshme.
Specialisti i politikave dhe i strategjive në arsim ka sqaruar se të gjithë prindërit që kanë dëshirë të blejnë paketën e librave mund ti blejnë ato në çdo fillim të vitit shkollor, por vetëm pranë librarive.
Në vitin e ri shkollor libra falas do të përfitojnë në të githë vendin edhe nxënësit e klasave të 5-ta.