Transmetuar më 23-12-2018, 22:22

Serbia ka shprehur dakordësinë që Shtetet e Bashkuara të përfshihen në dialogun mes Beogradit dhe Prishtinës.

Ministri i Inovacionit dhe Zhvillimit Teknologjik të Serbisë, Nenad Popoviç tha se Rusia është e gatshme të angazhohet në bisedimet Prishtinë-Beograd nëse SHBA-ja do të bashkohej drejtpërdrejt në këtë proces dhe nëse Beogradi zyrtarisht i kërkon Moskës një gjë të tillë.

Sipas zyrtarit të lartë të qeverisë serbe, hapat e Prishtinës, si vendosja e taksës 100 për qind ndaj mallrave serbe dhe miratimi i ligjit për formimin e Ushtrisë së Kosovës, tregoi se BE-ja “nuk ka fuqi për të ofruar garanci se marrëveshjet e arritura midis Beogradit dhe Prishtinës do të respektohen”.

“Këto lëvizje të Prishtinës, si dhe mungesa e reagimit të BE-së, varros marrëveshjen e Brukselit.

Tani, ne kemi nevojë për një format të ri të dialogut në mes të Beogradit dhe Prishtinës, i cili, në vend të përkujdesjes së BE-së, duhet të kryhet në kuadrin e OKB-së, me ndërmjetësimin e SHBA-së, Rusisë dhe Kinës”, theksoi ai. /k.k/noa.al/