Deputeti demokrat Enkelejd Alibeaj kërkon që Prokuroria e Tiranës të urdhërojë pezullimin nga detyra të Arta Markut dhe të nisë hetimin ndaj saj.

Në një dalje të sotme për mediat nga selia blu, ai tha se në mënyrë të qëllimshme dhe aktive, Arta Marku, gjatë 9 muajve në krye të prokurorisë i ka shërbyer vetëm një qëllimi, shkatërrimin e ekipit që po heton Saimir Tahirin dhe shpërbërjen e ekipit që nxori para drejtësisë, Emiljano Shullazin.

Sipas tij, me këtë detyrë Arta Marku u emërua në mënyrë të paligjshme nga Edi Rama në krye të prokurorisë dhe, duke goditur prokurorët e të dy dosjeve, e realizoi qëllimin brenda 9 muajsh.

Ai tha se opinioni publik u njoh ditën e djeshme me padinë e Partisë Demokratike ndaj kryeprokurores që, në shpërdorim të detyrës, i shërbeu Edi Ramës dhe krimit, për dështimin e hetimeve ndaj Saimir Tahirit.

“Mediat kanë sjellë prova që faktojnë se, pasi largoi Elisabeta Imerin nga çështja Tahiri, Arta Marku, largoi nga Prokuroria e Krimeve të Rënda edhe Besim Hajdarmatën, në të njëjtën ditë që u kërkua sekuestrimi i pasurive miliona euroshe të Habiljave dhe i Audit të famshëm të Saimir Tahirit, AA 003 GB, me të cilin Habiljat bënin trafik ndërkombëtar droge. Shpërdorimi i detyrës nga Arta Marku është një çështje që kërkon hetim të shpejtë nga Prokuroria e Tiranës, për të mos lejuar shkatërrimin e mëtejshëm të çështjeve Tahiri, Shullazi apo ndonjë dosjeje tjetër për të cilën është shqetësuar Edi Rama”, u shpreh Alibeaj.

Ai kërkoi pezullimin nga detyra të kryeprklurores dhe nisjen e hetimit ndaj saj, duke renditur me pika ato që sipas deputetit demokrat kanë nevojë për verifikim:

-Cilat janë lidhjet direkte apo indirekte të Arta Markut me Edi Ramën.

-Çfarë komunikimesh ka Arta Marku me Engjëll Agaçin dhe si kanë ndikuar ato në shkatërrimin e hetimeve për “Tahirin” dhe zvarritjen e çështjes “Shullazi”.

-Çfarë i kanë kërkuar kryeprokurores Fatmir Xhafaj, Ulsi Manja, Ermonela Felaj apo ndonjë deputet tjetër socialist.

Në këtë linjë tha se hetimet duhet të qartësojnë a ka patur kryeprokurorja kontakte me avokatët apo të dërguar të Emiljano Shullazit.

Gjithashtu, sipas tij, është po aq e rëndësishme të hetohet me shpejtësi baza ligjore për çdo emërim, lëvizje, transferim në prokurori, që nga koha kur në krye të saj është Arta Marku.

Alibeaj deklaroi në mbyllje, se hetimi pa vonesë për padinë penale të opozitës dhe pezullimi i Arta Markut nga detyra është shërbimi më i madh që prokurorët e ndershëm mund t’i bëjnë drejtësisë, duke mos lejuar që një kryeprokurore e përkohshme, “shërbëtore e krimit”, t’i bëjë Shqipërisë një dëm të përhershëm.  /a.y/noa.al