Transmetuar më 12-02-2018, 11:55
Publicitet

Ish-deputeti demokrat Astrit Patozi ka bërë me dije shkarkimin e tre anëtarëve të kryesisë në qytetin e Vlorës dhe shigjeton kreun e PD-së Lulzim Basha. Përmes një postimi të tij në rrjetin social Facebook Patozi shprehet se tre anëtarët u shkarkuan vetëm se nuk kishin folur mirë për Lulzim Bashën në rrjetet sociele.

“Mora vesh se 3 anëtarë kryesie të degës së Partisë Demokratike në Vlorë qenkan shkarkuar, se nuk paskan folur mirë në rrjete sociale për Lulzim Bashën. Dhe mbi të gjitha, gjyqin popullor ua paskan bërë në mungesë. Kjo është pasqyra më e qartë e katandisjes dramatike të forcës kryesore politike të opozitës sot. E cila, natyrisht, që dita-ditës po degradon duke marrë formën, ngjyrën dhe shijen e kryetarit të vet, të zgjedhur në mënyrë plebishitare pas "fitores" në zgjedhjet e vitit të shkuar”, shkruan Patozi.

Duke iu drejtuar kryedemokratit, Patozi shprehet se Basha e di se edhe shoku Enver nuk i shkarkonte dhe i fuste në burg të gjithë ata që e shanin.

“Po mirë mor Lul, kjo është partia që do të bindë shqiptarët se duhet ta ndjekin për t'i qeverisur? A e di ti që edhe shoku Enver nuk i shkarkonte dhe i fuste në burg të gjithë ata që e shanin? Sepse për disa prej tyre bënte sikur nuk e kishte marrë vesh, kur qëllonte që ishin të parrezikshëm apo nga sërë e pastër komuniste. Ky është bashkimi i demokratëve dhe hapja e Partisë Demokratike, për të cilat, ke një vit që po neverit të madh e të vogël në Shqipëri, duke bredhur televizion më televizion?”, shton më tej ish- deputeti.

Patozi ka këshilluar Bashën se sipas tij nëse do që të japë shembullin tamam për këtë temë, të bëhet burrë e të shkarkojë atë të parin dhe të mos merret me të vegjëlit sepse është e ulët.

“Provat t'i kam dhënë të forta, kam thënë boll për ty, ndonëse ende të gjitha, por kemi kohë, se këtu do të jemi. Ty mor Lulzim nuk të mjafton që u ke marrë peng partinë, i çove në greminë elektorale më 25 qershor, pastaj u vodhe edhe votat e shtëpisë më 22 korrik, por do edhe që të të mburrin për të gjitha këto.

Sepse ti Lul ke një problem. Ti do vetëm që të quhet se je pronari i vetëm i kosheres, edhe pse prej saj po ikin për ditë bletët. Por megjithë sa po bën, unë prapëseprapë jam shumë i bindur se demokratët do ta gjejnë forcën për t'u ringritur, siç e kanë bërë në vitet e vështira të pas 97-ës, edhe pse ti ua ke ndërlikuar shumë rrugën”, përfundon Patozi. /b.l/noa.al/

Loading...