Transmetuar më 06-12-2017, 11:56
Publicitet

Në ditën e dytë të vizitës së tij në Itali, kryetari i Bashkisë së Tiranës, Erion Veliaj zhvilloi një takim të hapur në Universitetin D’Annunzios në rajonin e Abruzzos, me studentë, sipërmarrës dhe administratorë, për të diskutuar mbi modelet e zhvillimit të qyteteve.

Veliaj bëri një paraqitje të Tiranës gjatë periudhës së tranzicionit, duke u ndalur në mënyrë të veçantë te punët dhe zhvillimi që ka pësuar kryeqyteti shqiptar në dy vitet e fundit.

“Kemi vendosur të mos përsërisim gabimet e së kaluarës. Pra, të mos mjaftohemi thjesht duke u dhënë zgjidhje emergjencave të momentit, por duke investuar tek e ardhmja. Kemi vendosur të ndërtojmë një model zhvillimi të qëndrueshëm për qytetin; të përballemi me nevojat e së tashmes, pa rrezikuar nevojat e së ardhmes; të mos veprojmë duke menduar sikur nuk ka një të ardhme pas mbarimit të mandatit tonë, por të investojmë për Tiranën e brezave që vijnë”, tha kreu i Bashkisë së Tiranës gjatë fjalës së tij në Universitetin .

Ai deklaroi se Bashkia e Tiranës, krahas investimeve në infrastrukturën urbane, një vëmendje të veçantë i ka kushtuar edhe zgjidhjeve inoavative, që gjithashtu lehtësojnë aksesin e qytetarëve te shërbimet.

“Çfarë e bën një qytet më të mirë? Ekonomia, shërbimet dhe infrastruktura, pa dyshim. Por, edhe inovacioni, rekreacioni, arti, kultura dhe mjedisi. Për herë të parë në historinë e Tiranës kemi vendosur të marrim parasysh edhe këta elementë, duke i konsideruar si investime strategjike për të ardhmen e qytetit. E nisëm punën tonë, duke ndërtuar një raport të ri me qytetarët, sepse kur sjell një ndryshim të tillë, është e domosdoshme t’i bësh qytetarët aktorë kryesorë të këtij ndryshimi, sidomos të rinjtë dhe fëmijët, të cilët nisur nga eksperienca jonë dhe jo vetëm, janë ata që përqafojnë më shpejt ndryshimin, por janë gjithashtu edhe mbështetësit më të mirë të ideve të reja”, tha Veliaj.

Gjatë qëndrimit në Itali, kryebashkiaku i Tiranës, i shoqëruar edhe nga Presidenti i Rajonit të Abruzzos, Luciano D’Alfonso, zhvilloi edhe një vizitë në komunitetin arbëresh që jeton aty. Ai vizitoi panairin e prodhimeve dhe artizanëve të arbëreshëve të zonës, ndërsa theksoi se komuniteti arbëresh është një urë lidhëse shumë e fuqishme për miqësinë që ekziston mes Italisë dhe Shqipërisë.

“Besoj se ekzistenca e komunitetit arbëresh është edhe një kompliment i madh për Abruzzon dhe Italinë. Shqiptarët ndodhen kudo, por jo në çdo vend kanë gjetur një derë të hapur dhe një komunitet mikpritës si këtu. Mendoj që është një kompliment për Italinë që konsiderohet një vend me mendje dhe zemër të hapur. Besoj se komuniteti arbëresh i bën nder të dy popujve, kanë marrë më të mirën e Shqipërisë, me më të mirën e Italisë dhe kanë ndërtuar një komunitet që është një shembull i shkëlqyer”, deklaroi ai.

Presidenti i rajonit të Abruzzos, Luciano D’Alfonso falenderoi Veliaj për vizitën dhe vlerësoi punën që ai po bën në krye të Bashkisë së Tiranës.

“Po mbaj një premtim të cilin e kam bërë para 20 vitesh, kur isha në krye të Rajonit, ndaj kam sjellë kryebashkiakun e Tiranës, z. Erion Veliaj, një kryebashkiak shumë i zoti, një ndër kryebashkiakët më të aftë. Pse insistojmë kaq shumë? Sepse ky vend ka identitet, kulturë, origjinalitet të cilin e vlerësojmë shumë dhe ka një frymë komunitare që më vjen mirë ta shoh kaq të kultivuar. Unë dua të falenderoj shqiptarët e Abruzzos, të cilët janë një faktor i rëndësishëm, veçanërisht në sektorin e ndërtimit, duke ndihmuar në aktivitetin ndërtues më kompleks që bëjnë italianët, abrucezët”, tha Presidenti i Rajonit të Abruzzos, Luciano D’Alfonso.

Ndërkaq, kryetari Veliaj dhe Presidenti i Rajonit të Abruzzos, D’Alfonso mbollën edhe një pemë në shenjë miqësie dhe bashkëpunimi në Piazza Italia.

Loading...