NOA Lajme - Agjencia Kombëtare e Lajmeve

Imuniteti në diskutim, Tahiri, prokurorit: M’u përgjigj! Kërkova të hetohet makina ime

Transmetuar më 20-10-2017, 13:47

Ish-ministri i Brendshëm Saimir Tahiri, pasi ka dëgjuar diskutimet mes përfaqësuesve të Prokurorisë së Krimeve të Rënda dhe deputetëve anëtarë të Këshillit të Mandateve, Rregullores dhe Imunitetit në Kuvend, ku po diskutohet kërkesa e Prokurorisë për heqjen e imunitetit dhe më tej arrestimin e tij, është kthyer me pyetje.

Ai drejtoi disa pyetje për Prokurorinë e Krimeve të Rënda, duke kërkuar nëse është referuar ndonjëherë material hetimor për shtetasit “Habilaj” përpara këtij rasti.

Ish-ministri mori përgjigje nga prokurori Besim Hajdarmataj, “Jo, nuk ka referim materiali”.

Më tej Tahiri e pyeti prokurorin, nëse ka dijeni se në shtator të vitit 2015 kur ai ka shkuar te Prokurori i Përgjithshëm për përfshirjen e makinës së tij nga Habilajt në trafik droge dhe ka kërkuar hetim dhe se procedimin penal që është mbyllur në 29.12 2015.

Prokurori u përgjigj se flet në cilësinë e Prokurorisë së Krimeve të Rënda.

Hajdarmataj i tha Tahirit, “Jeni përfshirë në një skandal politik, jeni këtu për të sqaruar pozitën tuaj”.

Tahiri iu kthye, “S’pres komente prej jush për skandale politike. Këto mi lini mua”.

Më tej tha “Prokuroria e Krimeve të Rënda ka hetuar për makinën time dhe përfshirje në trafik droge, u kam kërkuar të hetoni, mu përgjigj keni dijeni po ose jo për këtë hetim”.

Tahiri shtoi se fakti se ka shkuar personalisht në Prokurori për të kërkuar hetim, hedh poshtë çdo deklaratë të prokurorëve.

Në replikë, prokurorja e Krimeve të Rënda, Elisabeta Imeraj i tha “Ju jeni mësuar me deklarata, ne nuk jemi mësuar. Ne hetojmë mbi çfarë dyshojmë”.

Deputeti demokrat Eduard Halimi, tha se Tahiri nuk mund të gjykojë prokurorët.

Kjo bëri që drejtuesi i mbledhjes Gramoz Ruçi, të reagojë, duke thënë se Tahiri mund të shprehë konstatimet dhe më pas të kalohet në çështjen për të cilën janë mbledhur.

Avokati i Tahirit, Artan Hajdari, deklaroi se koha duhet të jetë në favor të mbrojtjes dhe se standardet duhet të respektohen.

“Jemi përballë një kërkese të shoqëruar me relacion dhe nuk përmenden ato prova që janë thelbi i kërkesës për këtë autorizim delikat”, deklaroi ai.

Tahiri pyeti se përveç Artan Habilaj me të cilin akuzohet se ka udhëtuar me makinën që kishte shitur, pyeti se kush janë të tjerët.

“Kam dalë unë Saimir Tahiri, me ndonjë nga këta persona jashtë Shqipërisë siç deklaroni se kam dalë në katër data, po ose jo. Komisioni do gjykojë nëse unë do shkoj në burg ose jo. Datat konfirmohen nga sistemi Tims, apo hamendësoni”, pyeti Tahiri.

Nga ana e tij prokurori Besim Hajdarmataj tha se “Ne kemi paraqitur një kërkesë, rrethana, fakte dhe komisioni vendos. Pala ka të drejtë të mbrohet, të argumentojë, por nëse vazhdojmë me pyetje-përgjigje kjo vazhdon pafund”.

Ruçi tha se prokurori nuk ka detyrim të bëjë gjykime të pjesshme apo të plota.

Hajdarmataj deklaroi se nuk ka asnjë lloj arsye të përgjigjet. /a.y/noa.al