Transmetuar më 11-09-2017, 16:25

Lëvizja Socialiste për Integrim ka bërë publike për mediat pyetjet që i ka dorëzuar Sekretarisë së Kuvendit, të cilat do të bëhen sot në lidhje me programin e qeverisjes që u prezantua paraditen e sotme nga kryeministri Edi Rama në Kuvend.

LSI ka paraqitur 19 pyetje lidhur me programin ku pyet ndër të tjera për prioritet e qeverisë për investimet publike, nëse do ketë shëndetësi falas, apo si do të shpërndahet buxheti i arsimit.

Grupimi politik Lëvizja Socialiste për Integrim

Sekretarisë së Kuvendit

Pyetjet drejtuar Kryeministrit për Programin Politik të Këshillit të Ministrave dhe përbërjen e tij. Grupimi Politik Lëvizja Socialiste për Integrim, paraqet pyetjet si më poshtë:

1. Cilat janë prioritet e qeverisë për investimet publike?

2. Sa % PBB do dedikohet për arsimin, shëndetësinë dhe bujqësinë? Sepse nga programi nuk ka asnjë qartësi si do prioritarizohen me financime këto sektorë?

3. Si do të shpërndahet buxheti arsimit sipas sektorëve që e përbëjnë atë, cila nga ministritë është përgjegjësja për arsimin profesional?

4. Premtimi juaj është që për 4 vitet e ardhshme do të mbulojmë plotësisht 75 % të nevojave për ujë në të gjithë territorin ? Çfarë do të thotë kjo?

5. Po çfarë mund të ketë më të rëndësishme sesa uji për qytetarët shqiptarë?

6. Për familjet në nevojë cila është paketa sociale? Apo sërish do kemi paketën e lëmoshës?

7. Do kemi me shëndetësi falas apo qeveria është bërë pishman?

8. Ndërsa investimet për kanalizime dhe largimin e ujërave të ndotura urbane premtoni deri në fund të mandatit vetëm në nivelin 48%…cila është harta e investimeve?

9. Do kemi prapë në Sarandë, në Ksamil etj çarje të kanalizimeve në kulmin e sezonit turistik? Çfarë mund të ketë më prioritare sesa shërbimi me ujë dhe investime në kanalizime?

10. Po bujqësia si mund të konsiderohet sërish prioritet kur thoni që në 4 vitet e ardhshme do të buxhetojmë 25 miliardë lekë?

11. Rreth 200 milion euro në 4 vite, janë gati më pak seç buxhetohet sot 50 milion euro në vit? E dini këtë?

12. Sa projektohet të jetë minimumi jetik në 4 vitet e qeverisjes prej sot deri në mbyllje të mandatit?

13. Sa e ka impaktin në buxhet qeveria eksperimentale? Sa largime nga puna? Kosto?

14. Cilat do të jenë masat që do të merren nga qeveria për eliminimin e analfabetizmit funksional dhe braktisjes së shkollës?

15. Në kuadrin e integrimit evropian, barazia gjinore dhe strategjia e luftës kundra dhunës janë çështje të kapitullit 23 te drejtësia, cila nga ministritë do të jetë ajo që do të ketë përgjegjësi për çështjet e barazisë gjinore, pasi në programin e paraqitur, asgjë nuk ishte e qartë?

16. Çfarë mekanizmi do përdorni për thithjen e 100 miliardë lekë investime?

17. Në program flisni për investime publike në energjitkë, rreth 50 miliardë. Ndërkohë premtoni korridorin Adriatik – Jonian i cili kërkon rreth 80 miliardë. A e keni bërë aritmetikën e këtyre investimeve?

18. Në program nuk përmendni trajtimin e mbetjeve. Nuk keni asnjë politikë për këto?

19. Në program nuk keni asnjë incentivë për punësimin? /b.l/noa.al/