U përcoll drejt Gjermanisë ekuipazhi i një helikopteri “Cougar” të Forcës Ajrore për të marrë pjesë në stërvitjen shumëkombëshe “Saber Junction 17” e drejtuar nga Shtetet e Bashkuara të Amerikës.

Në përcjelljen e pilotëve dhe teknikëve të bordit drejt të parës stërvitje jashtë vendit, e cila përkon me 66-vjetorin e krijimit të Forcës Ajrore, ishte e pranishme ministrja e Mbrojtjes znj. Mimi Kodheli, zëvendësshefi i Shtabit të Përgjithshëm të FA gjeneral brigade Dedë Prenga, komandanti i Forcës Ajrore gjeneral brigade Vladimir Avdiaj, komandantë të forcave, atashe ushtarakë në vendin tonë dhe ish-pilotë.

Komandanti i Forcës Ajrore, gjeneral brigade Vladimir Avdiaj, vlerësoi pjesëmarrjen e ekuipazhit shqiptar në këtë stërvitje ndërkombëtare, e cila siç tha ai “tregon rritjen dhe pjekurinë profesionale të ekuipazheve tona dhe përvetësimin nga ana e tyre të standardeve më të përparuara të Aleancës.”

Nga ana e saj, ministrja e Mbrojtjes Mimi Kodheli shprehu krenarinë për Forcat Ajrore që nga dita e krijimit e deri më sot, me nisjen e “shqiponjave tona ‘Cougar’ për të marrë pjesë për herë të parë në një stërvitje që do të zhvillohet jashtë kufijve të atdheut.”

Ministrja Kodheli uroi të gjithë pilotët dhe ish-pilotët për 66-vjetorin e krijimit të Forcës Ajrore të Shqipërisë dhe foli për misionet në të cilat do të marrin pjesë Forcat Ajrore, duke falenderuar ata që bënë të mundur pjesëmarrjen e Shqipërisë në një mision të tillë. “Pilotët që do të fluturojnë drejt Gjermanisë, do të ngrihen për të kapur lartësi të reja suksesi e arritjesh, duke u bashkuar dhe marrë pjesë në dy stërvitje të rëndësishme, ‘Saber Junction 17’ dhe ‘Combined Resolve VIII’, me aleatët tanë strategjikë forcat amerikane, në kuadër të bashkëpunimit ushtarak dypalësh midis vendeve tona. Falenderoj Zyrën Amerikane të Bashkëpunimit të Mbrojtjes dhe Atasheun e SHBA-ve në Tiranë për realizimin e kësaj pjesëmarrje”, u shpreh Kodheli.

Ajo solli në vëmendje se pjesëmarrja e Forcës Ajrore në këto stërvitje jashtë vendit, vjen pas shtimit të pranisë dhe kontributit të Forcës Tokësore dhe asaj Detare në misionet ndërkombëtare.

Pjesëmarrja në stërvitjen “Saber Junction 17” i shërben drejtpërdrejt përgatitjes në përmbushje të detyrimeve ndaj Aleancës, për të vendosur në të ardhmen, në gatishmëri të plotë dy helikopterë Cougar, për t’u bërë pjesë e operacioneve të NATO-s.