Siel ka vetëm 10 ditë që ka ardhur në jetë, e megjithatë fati e ka përplasur që në ditët e para me sëmundjen e fibrozës cistike, një sëmundje gjenetikisht e transmetueshme që prek të gjitha organet e brendshme. Babai i vogëlushes Siel, Elson Jaçaj, thotë për “Ora News” se sëmundja është konstatuar 2 ditë pas lindjes.

“Ditën e dytë mjekët diagnostikojnë që fëmija kishte problem me jashtëqitjen edhe e dërguan në QSUT në pediatri për një konsultë për një dyshim për përdredhje zorre. Aty konstatuan se fëmija ishte me fibrozë cistike. Një sëmundje gjenetikisht e transmetueshme”, shprehet ai.

Sipas tij, në Shqipëri kjo sëmundje nuk mund të kurohet, ndërsa për ta dërguar jashtë kostot janë mbi 20 mijë euro. “Këtu në vendin tonë trajtimi i kësaj sëmundje është i pamundur. Kurimi është shumë i madh, pasi në çdo vakt ushqimi fëmija ka nevojë që të marrë medikamentin e duhur.

Në fazat e para të jetës është kosto e vogël, por më pas edhe mjekimet janë më të mëdha dhe më të shtrenjta. Ne  kemi biseduar për transport jashtë, por vetëm kosto transporti kushton mbi 20 mijë euro sepse fëmija është në inkubator dhe do transport specifik. Mjekët thonë që jashtë ka zgjidhje, jetëgjatësia është më e madhe”, vijon ai.

Babai i Siel ka vënë në dispozicion edhe numrat e kontaktit për të gjithë ata që duan ta ndihmojnë vogëlushen Siel të jetojë. Siel ndodhet e shtruar në reanimacionin e maternitetit “Koço Gliozheni”.