Kreu i PS-së, Edi Rama gjatë mbledhjes së grupit parlamentar socialist të mbajtur sot është shprehur se do të zhvillohen zgjedhje në datë 18 qershor edhe nëse Partia Demokratike nuk hyn në to.

“PS duhet të dalë forcë e parë në zgjedhje. Dilni në terren dhe përgatituni. Alternativa e vetme është fitorja. Në zgjedhje do të futemi edhe pa PD-në. Ne nuk mund të krahasohemi me Maqedoninë ne e duam Reformën në Drejtësi ndaj dhe do ta çojmë atë deri në fund. Mos mungoni në seancës e së enjtes”, mësohet se është shprehur Rama me deputetët socialistë.

Pas deklaratave të Ramës, ka reaguar edhe kryetari i Partisë Demokratike Lulzim Basha. Në një status në Facebook, Basha thotë se nuk mund të ketë qeverisje të dalë nga zgjedhjet pa opozitën.

Kreu i demokratëve ka akuzuar Kryeministrin Edi Rama dhe funksionarët e Partisë Socialiste, për të cilët thotë se janë pinjollë të ish-elitës komuniste. Sipas tij, protesta opozitare do të vazhdojë për të arritur synimin e saj, që zgjedhjet mos diktohen nga krimi.

“Trimat dhe trimëreshat socialiste, shërbëtorë të krimit por që ndihen padronë të popullit, duhet të kuptojnë se zgjedhje pa opozitën nuk mund të ketë, se qeverisje të dalë nga zgjedhje pa opozitën nuk mund të ketë. Ne nuk kemi asnjë ngut dhe nuk kemi asnjë mëdyshje. Ne jemi të qetë, por të palëkundur në qëndresën tonë”, shprehet Basha.

Reagimi i plotë Lulzim Bashës:

Edi Rama dhe udhëheqësit e lartë të PS-së, pothuajse të gjithë funksionarë ose pinjollë të ish-elitës komuniste, ngatërrojnë dëshirat e tyre me vullnetin e popullit dhe identifikojnë karriken e tyre me demokracinë. Ata e kanë të vështirë të kuptojnë pluralizmin, të kuptojnë sovranitetin e qytetarëve mbi pushtetin e tyre.

Trimat dhe trimëreshat socialiste, shërbëtorë të krimit por që ndihen padronë të popullit, duhet të kuptojnë se zgjedhje pa opozitën nuk mund të ketë, se qeverisje të dalë nga zgjedhje pa opozitën nuk mund të ketë. Ne nuk kemi asnjë ngut dhe nuk kemi asnjë mëdyshje. Ne jemi të qetë, por të palëkundur në qëndresën tonë.

Zgjedhje të ndikuara apo kontrolluara nga krimi nuk do të ketë. Zgjedhje me shërbëtorë të krimit në qeverisje nuk do të ketë. Zgjedhje me Edi Ramën kryeministër nuk do të ketë. Situata është e qartë dhe e thjeshtë: ne jemi me popullin, ata janë me krimin. Vetëm njerëzit me gjendje jo të kthjellët psiqike nuk e kuptojnë dot se cili do të jetë rezultati i kësaj përballjeje./b.l/noa.al/