Tre ministri kanë hartuar këtë të hënë draftin e vendimit të Këshillit të Ministrave për evidentimin dhe vlerësimin e dëmeve shkaktuar banesave në fshatin Zharrëz.
Sipas një njoftimi për shtyp të Ministrisë së Energjitikës dhe Industrisë, drafti në fjalë do të miratohet në mbledhjen e radhës të qeverisë, që do të mbahet ditën e mërkurë.
Po sipas këtij vendimi, dëmshpërblimi i dëmeve të shkaktuara në banesa dhe pasuri brenda tyre do bëhet menjëherë pas vlerësimeve të bëra në terren. Afati për realizimin e këtyre vlerësimeve është 30 ditë nga momenti i miratimit të këtij vendimi.
Një ditë më parë, MEI urdhëroi kompaninë e naftës që menaxhon fushat në njësinë administrative të Patosit, që përfshin edhe Zharrëzën, të ndërpresë aktivitetet naftëxjerrëse deri në një urdhër të dytë.
Banorët e fshatit mëngjesin e së shtunës mbërritën në Tiranë, pas një marshimi të gjatë në këmbë, për të protestuar përpara selisë së Ministrisë së Energjitikës. Më pas, ata u pritën në një takim nga zëvendës kryeministri Niko Peleshi, nga i cili morën garanci për zgjidhjen e problemeve.