Transmetuar më 07-02-2017, 12:16

Prishtinë, 7 shkurt 2017, NOA.al- Presidenti i Kosovës, Hashim Thaçi, priti sot një grup të alpinistëve kosovarë, të cilët në muajt e ardhshëm do të ngjitën në majën e Everestit.

Presidenti Thaçi tha se përmes sukseseve në shumë disiplina sportive, kosovarët janë duke forcuar identitetin shtetëror dhe duke e promovuar Kosovën në botë.

“Jam i vetëdijshëm për rreziqet që paraqet kjo ekspeditë dhe do t’iu mbështesim në çdo hap”, shtoi Thaçi.

Nga ana tjetër, udhëheqësi i grupit të alpinistëve, Nazmi Hasanramaj, u shpreh se kjo ekspeditë i kushtohet shtetit të Kosovës dhe për porosi ka paqen dhe promovimin e shtetësisë.

“Qëllimi final është ngritja e flamurit të Kosovës në Everest, që sot na dhuruat”, shtoi ai.

Grupi i përbërë nga Nazmi Hasanramnaj, Qëndrim Sopi, Arineta Mula dhe Haki Hasanramaj janë duke i vazhduar përgatitjet për ngjitjen e vargmaleve më të larta në botë, të cilat janë mbi 8800 metra të larta.

“Tash e tri vjet jemi duke u përgatitur. Përgatitjet psikofizike jemi duke i vazhduar intensivisht, ndërsa profesionalisht dhe shpirtërisht jemi përgatitur për të gjitha sfidat, rreziqet dhe sakrificat e mundshme që mund të na presin atje”, tha Hasanramaj.

Presidenti Thaçi e vlerësoi lartë guximin e alpinistëve për këtë iniciativë dhe rrugëtim përplot sakrificë.

“Pushtimi i majave të Everestit dhe ngritja e flamurit të Kosovës nga ju, do të jetë një lajm i jashtëzakonshëm për republikën tonë”, u shpreh Presidenti Thaçi.