Transmetuar më 28-01-2017, 08:58

Procedurat për çregjistrimin janë kthyer në një makth të vërtetë për bizneset, Për t'u ardhur në ndihmë bizneseve Drejtoria e Tatimeve, për ta bërë sa më të thjeshtë këtë shpjegim për biznesin, ka bërë gati një manual të shkurtër për të gjithë hapat që i duhen një biznesi për tu çregjistruar. Siç shkruan “Gazeta Shqiptare”, çregjistrimi tatimor nuk eliminon detyrimet ekzistuese tatimore dhe nuk parandalon administratën tatimore të vlerësojë ose të mbledhë detyrimet tatimore. Tatimet dhe QKB-ja nga fillimi i procedurës së çregjistrimit dhe deri në çregjistrimin përfundimtar, njoftohen në të njëjtën kohë edhe tatimpaguesit. Sipas manualit datë e çregjistrimit të tatimpaguesit në administratën tatimore është data e çregjistrimit në QKB ose gjykatë. Datë e çregjistrimit të personave të vetëpunësuar në veprimtari tregtare apo shërbimi ambulant, të kryefamiljarit, që punëson individë si punëtore shtëpie, kujdestare etj, të kësaj natyre, të përfaqësuesve tatimorë dhe fermerit është data e miratimit të çregjistrimit të tyre nga administrata tatimore, por me efekt në datën e paraqitjes së kërkesës për çregjistrim.

Mbyllja e biznesit

Mbyllja e një biznesi bëhet me anë të aplikimit për çregjistrim. Subjektet çregjistrohen nga regjistri tregtar në rastet e parashikuara nga legjislacioni në fuqi, për prishjen dhe pavlefshmërinë e personave juridikë, shpërndarjen e shoqërisë së thjeshtë, në rastet e përfundimit të ushtrimit të veprimtarisë të personit fizik, si dhe në çdo rast tjetër, të parashikuar nga legjislacioni në fuqi. Sipas manualit të Drejtorisë së Tatimeve, Qendra Kombëtare e Biznesit ose gjykata, menjëherë me marrjen e kërkesës për çregjistrim, prej tatimpaguesit, njofton organin tatimor kompetent për çregjistrimin e hapjes së procedurave të likuidimit ose për kërkesën për çregjistrim e hapjes së procedurave të likuidimit për çregjistrimin  e personit fizik apo për aplikimin për çregjistrim të personit juridik edhe kur kemi të bëjmë me aplikimin për çregjistrim pa kryerjen e likuidimit.

Tatimet

Organi tatimor kompetent, brenda 10 ditëve pune nga data e paraqitjes së kërkesës për çregjistrim, është i detyruar të verifikojë situatën tatimore të subjekteve dhe njofton njëkohësisht QKB-në ose gjykatën dhe subjektin. Kur organi tatimor, sipas analizës së riskut, gjykon se është e nevojshme të ushtrojë kontroll në mjedisin ku ushtron veprimtarinë subjekti, atëherë ku afat nuk mund të jetë më shumë se 30 ditë pune, përfshirë kryerjen e kontrollit. Qendra Kombëtare e Biznesit ose gjykata nuk mund të kryejë çregjistrimin në qoftë se brenda afatit 30 ditor të sipërpërmendur, administrata tatimore e kundërshton me shkrim çregjistrimin. Kundërshtimi i çregjistrimit të tatimpaguesit dhe në rastin e personit juridik, faktin se ai nuk ka paraqitur pasqyrat financiare të mbylljes së aktivitetit deri në momentin e likuidimit, ose nuk ka dorëzuar deklaratat tatimore. Në rastin kur subjektet e regjistruara pranë QKB-së ose gjykatës rezultojnë me detyrime tatimore, përfshirë detyrimet që lindin në rastin kur çregjistrimi kryhet me likuidim.  Në rastin kur kundërshtimi për çregjistrim nga organet tatimore është bërë si pasojë e mosdorëzimit të pasqyrave financiare ose deklaratave tatimore, atëherë, me paraqitjen e tyre, organi tatimor kompetent detyrohet të tërheqë menjëherë kundërshtimin për çregjistrim dhe Qendra Kombëtare e Biznesit kryen menjëherë çregjistrimin e tatimpaguesit.

Detyrimet

Pavarësisht nga shlyerja e detyrimit, për të cilin është kundërshtuar çregjistrimi, organi tatimor kompetent nuk ka tërhequr kundërshtimin, atëherë subjekti paraqet pranë Qendrës Kombëtare të Biznesit dokumentin që vërteton shlyerjen e këtyre detyrimeve tatimore. Në këtë rast, QKB kryen menjëherë çregjistrimin e subjektit dhe njofton organin tatimor kompetent dhe tatimpaguesin.