Transmetuar më 22-01-2017, 11:42

Pronarët e mjeteve që nuk kanë paguar taksat para vitit 2010 dhe duan të mos çregjistrojnë mjetet, por t’i mbajnë ato në qarkullim, duhet të paguajnë taksat për periudhën nga janari i vitit 2011 deri tani. Pronarët e këtyre makinave do të përfitojnë faljen e gjobave dhe kamatave për periudhën janar 2011 deri në dhjetor 2014, shkruan “gazeta shqiptare”.

Ndërkohë, Drejtoria e Përgjithshme e Shërbimit të Transportit rrugor ka nisur punën për hartimin e rregullores, e cila do të zbatohet menjëherë pas miratimit në qeveri të projektligjit "Për pagesën dhe fshirjes e pjesshme të detyrimeve tatimore dhe detyrimeve të pagueshme në doganë, si dhe procedura e heqjes nga qarkullimi të mjeteve të transportit pas fshirjes së detyrimeve tatimore".

Mjetet në qarkullim

"Personave të cilët paraqiten dhe kërkojnë moskryerjen e procedurës së heqjes nga qarkullimi të mjetit ose mbajtjen aktiv të tij u fshihen detyrimet tatimore për periudhat dhjetor 2010 e më parë, me kusht që të paguajnë detyrimet për periudhën janar 2011 e në vijim, me përjashtim të gjobave dhe kamatëvonesave të periudhës janar 2011 deri në dhjetor 2014, të cilat fshihen", thuhet në projektvendimin e Ministrisë së Financave, i cili ndodhet në qeveri.

Përveç sa parashikohet në këtë ligj, në përputhje me përcaktimet sipas këtij neni, hiqen nga qarkullimi të gjitha mjetet e regjistruara në Drejtorinë e Përgjithshme të Shërbimit të Transportit Rrugor, për të cilat nuk është kryer asnjë veprim me këto mjete pas datës 31 dhjetor 2011 e në vijim.

Heqja nga qarkullimi

Heqja nga qarkullimi i këtyre mjeteve bëhet pasi fshihen detyrimet tatimore të papaguara për to, si: taksa e regjistrimit të përvitshëm të mjeteve dhe taksave vjetore e q2arkullimit rrugor, taksa vjetore e mjeteve të përdorura, taksa e mjeteve luksoze, si dhe gjobat e llogaritura për efekt të mospagimit të taksave.

Subjektet/personat përgjegjës kanë të drejtë që brenda 6 muajve nga data e hyrjes në fuqi të këtij ligji, të paraqiten pranë DPSHTRR për të kryer pa pagesë veprimet e heqjes nga qarkullimi të mjetit apo për të kërkuar moskryerjen e procedurës së heqjes nga qarkullimi dhe mbajtjen aktiv të tij.

Personave të cilët paraqiten dhe kërkojnë moskryerjen e procedurës së heqjes nga qarkullimi të mjetit ose mbajtjen aktiv të tij, u fshihen detyrimet tatimore për periudhat dhjetor 2010 e më parë, me kusht që të paguajnë detyrimet për periudhën janar 2011 e në vijim, me përjashtim të gjobave dhe kamatëvonesave të periudhës janar 2011 deri në dhjetor 2014, të cilat fshihen.

Udhëzimi

Burime zyrtare në Drejtorinë e Përgjithshme të Shërbimit të Transportit Rrugor bëjnë të ditur se ka nisur puna për hartimin e udhëzimit që do të zbatohet pas miratimit të projektligjit. "Ministria e Financave ka iniciuar dhe dërguar në Këshillin e Ministrave projektligjin "Për pagesën dhe fshirjen e pjesshme të detyrimeve tatimore dhe detyrimeve të pagueshme në doganë, si dhe procedura e heqjes nga qarkullimi të mjeteve të transportit pas fshirjes së detyrimeve tatimore’.

Për zbatimin e ligjit do të dalë udhëzimi, për të cilin po punohet paralelisht në mënyrë që të dalë në të njëjtën kohë me miratimin e ligjit. Për këtë arsye nevojitet ndihma juaj përsa u përket parashikimeve që lidhen me procedurën për heqjen nga qarkullimi i mjeteve të transportit që nuk janë në qarkullim dhe fshirjen e detyrimeve tatimore për këto mjete. Më poshtë po ju paraqesim dispozitën e nenit 12, për të cilën do të vlerësonim kontributin tuaj për parashikimet që do të bëhen në udhëzim me këtë nene", thuhet në letrën që kanë marrë zyrtarët e Drejtorisë së Përgjithshme të Shërbimit të Transportit Rrugor.

Procedura e çregjistrimit të mjeteve dhe faljes së detyrimeve

1. Çregjistrohen të gjitha mjetet e regjistruara në Drejtorinë e Përgjithshme të Shërbimit të Transportit Rrugor, të cilat nuk kanë kryer asnjë veprim me këto mjete pas periudhës 31 dhjetor 2011.

2. Çregjistrimi i mjeteve bëhet pa paguar detyrimet e prapambetura si: taksën e regjistrimit të përvitshëm të mjeteve dhe taksën vjetore të qarkullimit rrugor, taksën vjetore të mjeteve të përdorura, taksën e mjeteve luksoze, si dhe gjobat e llogaritura për efekt të mospagimit të taksave e tarifave. Taksapaguesit/ personat përgjegjës kanë të drejtë që brenda datës 31.03.2017 të paraqiten pranë DPSHTRR për të kryer pa pagesë së çregjistrimit të mjetit dhe mbajtjen aktiv të tij.

3. Personave të cilët paraqiten dhe kërkojnë moskryerjen e procedurës së çregjistrimit të mjetit dhe mbajtjen aktiv të tij u falen detyrimet tatimore për periudhat përpara dhjetorit 2011 dhe duhet të kryejnë pagesat e të gjitha detyrimeve që u përkasin periudhave pas janarit 2012 dhe u falen gjobat për këtë periudhë.

4. Nëse brenda datës 31.03.2017 personat e interesuar nuk paraqiten për të kërkuar mbajtjen aktiv të mjetit, DPSHTRR-ja do të kryejë pa pagesë çregjistrimin e mjeteve dhe shuan detyrimet tatimore për këto mjete.

5. Lista e mjeteve me targat përkatëse të çregjistruara sipas këtij ligji i dërgohen Ministrisë së Punëve të Brendshme dhe Drejtorisë së Policisë së Shtetit për bllokimin dhe sekuestrimin e tyre.

Falja

1. Falen detyrimet për 140 mijë mjete.

2. Falen gjobat për mjetet që paguajnë taksat.

3. Falen gjobat dhe taksat për mjetet që do dalin nga qarkullimi.

4. Për makinat që s’kanë paguar detyrimet para vitit 2011 falen gjobat dhe taksat në rast se çregjistrohen.

5. Pronarët e mjeteve që s’kanë paguar detyrimet para vitit 2001 dhe duan të mbajnë makinat, duhet të paguajnë vetëm taksat pas vitit 2011 e në vazhdim u falen kamatat në rast se paguajnë të gjitha detyrimet, pra për periudhën 2012-2015.