Kreu i Kuvendit Ilir Meta, mohon zërat për një krizë në koalicionin qeverisës ndërsa shprehet se marrëveshja për të qeverisur vendin do të zbatohet deri ditën e fundit.

Gjatë një interviste për “ABC News”, ai tha se ka një marrëveshje dhe është mazhoranca e duhur për të përmbushur këtë marrëveshje dhe pritshmëritë e qytetarëve që e kanë votuar këtë koalicion.

“Unë besoj se nuk ka asnjë arsye këtu për çështje si qeveri teknike, qeveri ekspertësh. Unë mendoj se ka ndodhur një mbivendosje e panevojshme, sepse kur unë kam bërë një propozim, ju e përmendët, nuk ka qenë në funksion të krijimit të një qeverie ekspertësh, por një zgjidhje në një situatë ngërçi kur ditët po fironin dhe po shkonin drejt datës 21 korrik”, deklaroi Meta.

Ai shtoi se kishte një afat me Bashkimin Europian, me Shtetet e Bashkuara të Amerikës, ku duhet të përmbylleshin disa procedura, lidhur me miratimin e reformës në drejtësi.

Sipas tij, gjithçka ishte në funksion të miratimit të reformës dhe kapërcimit të atij mosbesimi që, siç thotë ai dukej te fakti që ndoshta opozita, më shumë sesa çështje konkrete, kishte shqetësimin që qeveria apo mazhorancë, Rama-Meta, do të përdorte ekzekutivin për të ndikuar në kapjen e institucioneve të reja të drejtësisë.

Meta shton më tej se kjo çështje u kapërcye dhe se Partia Demokratike nuk vuri një kusht të tillë.

“Ajo kishte përmbushjen kryesisht të rekomandimit 88, i cili pothuajse u përmbush dhe çdo gjë vajti shumë mirë. Pastaj qeveria teknike, që ka kërkuar zoti Basha, e ka kërkuar prej kohësh, e ka kërkuar prapë dhe do ta kërkojë prapë”, tha ai.

Kryeparlamentari shprehet se nuk e di pse, por ekziston një dëshirë për të krijuar tensione të panevojshme, ndërkohë që reforma u miratua me më shumë konsensus se sa pritej

“Dhe jo vetëm kaq, por kemi parasysh se jemi dhe në një sezon turistik dhe është e kuptueshme, ku njerëzit bëjnë pushime, sezonit i kushtohet më shumë vëmendje, sepse koalicioni mendoj është në rrugën e tij normale”, deklaroi Ilir Meta.

Intervista e plotë e kreut të Kuvendit

Një stinë e nxehtë jo vetëm se është verë, por kam idenë edhe një stinë e ngarkuar për ju…

Qëlloi kjo stinë kështu. Ka pasur mjaft ngarkesa. Kishim dhe Kampionatin Europian, ku vendi ynë u paraqit shumë mirë. Patëm edhe sfidën tjetër, atë të reformës kushtetuese për reformën në drejtësi. Mendoj se këtu dolëm edhe më mirë se sa mendohej.

E mbaj mend mesazhin e Komisionerit për Zgjerim, z. Hahn, përpara Kampionatit Europian, ku i bëri thirrje politikës që të gjente mënyrën për ta miratuar këtë reformë me kompromis, me konsensus, në mënyrë që dhe Shqipëria të kualifikohej për në fazën tjetër.

Pra, duke bërë një paralelizëm me Kampionatin Europian të futbollit, ideja ishte që Shqipëria të ecte drejt një rekomandimi pozitiv për çeljen e negociatave për anëtarësim dhe unë them që jemi në këtë rrugë dhe duhet të qëndrojmë këtu.

Një stinë pak e ngarkuar, duket që reforma në drejtësi pati një moment ku kurba ishte e ngritur. Ishit ju që dolët në një ditë të diel në një konferencë për shtyp, ku përmendët atë që u quajt qeveri ekspertësh. Situata u pështjellua disi, sepse u mendua që do të shkohej deri në zgjedhje të parakohshme me një qeveri tjetër. Si janë marrëdhëniet në koalicionin qeverisës?

Mendoj se marrëdhëniet në koalicion në përgjithësi janë mjaft normale, megjithëse këtu portalet prodhojnë lajme të papara çdo minutë. Nuk e di, por ekziston një dëshirë për të krijuar tensione të panevojshme, ndërkohë që reforma u miratua me më shumë konsensus se sa pritej. Pra, unë kam luftuar që ditën e parë për konsensus, por nuk e kam ëndërruar vërtet për 140 vota pro reformës.

Dhe jo vetëm kaq, por kemi parasysh se jemi dhe në një sezon turistik dhe është e kuptueshme, ku njerëzit bëjnë pushime, sezonit i kushtohet më shumë vëmendje, sepse koalicioni mendoj është në rrugën e tij normale.

E them për koalicionin, sepse, në fakt, keni pasur takime me z. Basha. Duket se ka një lloj zbutjeje me z. Basha. Nuk kam ndër mend të risjell intervistën që dhatë te Zëri i Amerikës, ku për të shprehët një farë vlerësimi…

Unë nuk mund të mos vlerësoj faktin që z. Basha ka treguar një qasje konstruktive, të paktën nga takimi i parë që unë kam zhvilluar më 12 qershor. Nuk e harroj këtë datë, sepse kjo është ditëlindja e Partisë Socialiste, por qëlloi që ishte edhe ditëlindja e z. Basha.

Pra, nga ai takim unë kërkova mirëkuptimin e opozitës për procedurat parlamentare të miratimit të reformës në drejtësi, në mënyrë që të mos fillonim me kontestime, sepse është një histori e gjatë dhe vetëm konsensusi mbylli shumë çështje, të cilat mund të ktheheshin në një pengesë, ose të minonin të gjithë legjitimitetin dhe ecurinë e kësaj reforme shumë të rëndësishme dhe shumë jetike.

Pra, nga ai moment e deri tani qasja e tij mendoj se ka qenë shumë më konstruktive sesa unë kam menduar apo mund të kem paragjykuar për shkak të informacioneve të ndryshme, apo paraqitjes mediatike të pozicionit të Partisë Demokratike.

Dhe kjo nuk ka lidhje me koalicionin PS-LSI, por ka lidhje me reformën në drejtësi dhe reforma në drejtësi është një çështje shumë më e madhe sesa çështja e koalicionit. Mendoj se edhe miratimi i reformës me konsensus është një kontribut për ecurinë më të mirë të këtij koalicioni dhe të vetë qeverisë, sepse është mundësia për të punuar në një klimë politike më të qëndrueshme dhe me më pak tensione, në rast se do të ndodhte e kundërta.

Si po funksionon koalicioni në opinionin tuaj? Do t’ju bëj një pyetje që po qarkullon: a do të ketë zgjedhje të parakohshme, qeveri teknike? Do t’i mbyllni këta 4 vjet së bashku me Edi Ramën në koalicion?

Unë besoj patjetër, për arsye se ne kemi një marrëveshje dhe kemi maxhorancën e duhur për të përmbushur këtë marrëveshje dhe pritmëritë e qytetarëve që e kanë votuar këtë koalicion.

Dhe jo vetëm ata që kanë votuar koalicionin, por qeveria është përgjegjëse, gjithashtu, për të gjithë qytetarët e këtij vendi, edhe për ata që nuk e kanë votuar, apo nuk do ta votojnë. Kështu që unë besoj se nuk ka asnjë arsye këtu për çështje si qeveri teknike, qeveri ekspertësh. Unë mendoj se ka ndodhur një mbivendosje e panevojshme, sepse kur unë kam bërë një propozim, ju e përmendët, nuk ka qenë në funksion të krijimit të një qeverie ekspertësh, por një zgjidhje në një situatë ngërçi kur ditët po fironin dhe po shkonin drejt datës 21 korrik.

Pra, kishim një afat me Bashkimin Europian, me Shtetet e Bashkuara të Amerikës, duhet të përmbyllnim disa procedura. Konsensusi, sipas meje, ishte shumë pranë, por nuk po merrej përgjegjësia për të realizuar këtë konsensus dhe për asgjë mund të sakrifikohej një gjë shumë e madhe. Atëherë, gjithçka ishte në funksion të miratimit të reformës dhe kapërcimit të atij mosbesimi që, sipas meje, dukej te fakti që ndoshta opozita, më shumë sesa çështje konkrete, kishte shqetësimin që kjo qeveri apo kjo maxhorancë, Rama-Meta, do të përdorte ekzekutivin për të ndikuar në kapjen e institucioneve të reja të drejtësisë.

Por kjo çështje u kapërcye. Partia Demokratike nuk vuri një kusht të tillë. Ajo kishte përmbushjen kryesisht të rekomandimit 88, i cili pothuajse u përmbush dhe çdo gjë vajti shumë mirë. Pastaj qeveria teknike, që ka kërkuar zoti Basha, e ka kërkuar prej kohësh, e ka kërkuar prapë dhe do ta kërkojë prapë.

Opozita gjithmonë kërkon zgjedhje të parakohshme. Mbaj mend vitet ‘92-‘96, kur kam qenë në opozitë për herë të parë me Partinë Socialiste, e cila ajo ishte e papërfillshme për sa i takon peshës në Parlament, pasi Partia Demokratike kishte 80% mos më shumë, ne që 6 muajt e parë kërkonim zgjedhje të parakohshme dhe deri në fund nuk u lodhëm së kërkuari zgjedhje të parakohshme.

E keni përmendur këtë: “Ne jemi në një demokraci të pakthyeshme, ata që sot janë në maxhorancë, mund të jenë nesër në opozitë dhe anasjelltas”.

Patjetër, kjo është e vërteta. Pas 26 vjetësh unë besoj se të gjithë duhet të jemi më pak emocionalë, duhet ta vendosim veten tonë edhe në pozitën e kundërshtarit, sepse ndonjëherë kur je në pushtet ndihesh në një pozitë shumë më komode.

Duket sikur do të jesh gjithmonë, aq më tepër ky politikan, me përvojën që kam, që kam qenë në pozita të ndryshme Kryeministër, tre herë Zv.Kryeministër, në opozitë e kështu me radhë. Mendoj se një ftesë për të gjithë për ta parë veten edhe në pozicionin e kundërshtarit, është e mirë dhe na ndihmon për të qenë më realistë dhe më me këmbë në tokë.

Për të dhënë zgjidhje të qëndrueshme për vendin, sepse ato që sot duken si të drejtat e opozitës ose si garanci të opozitës, nesër do të jenë garancitë e tua.

Ju keni qenë në qeveri me z. Berisha deri në vitin 2013, një nga elementet që u fol gjatë për rrëzimin e z. Berisha, e qeverisë së tij ishte arroganca, por koalicioni në të cilin ju jeni, a mendoni se është arrogant? Qeverisja e Ramës është arrogante në opinionin tuaj?

Unë besoj se në përgjithësi ne shqiptarët duhet të jemi më të përmbajtur në administrimin e pushtetit. Edhe unë kam qenë Kryeministër, mund të kem bërë sjellje arrogante apo të forta, që mund të vijnë edhe nga mungesa e eksperiencës dhe nga dëshira një herë për të demonstruar pushtet, sidomos kur opozita kërkon të të provokojë, por besoj se gjithmonë është më e mirë toleranca sesa arroganca, sidomos kur je në pushtet.

Kush mbizotëron në qeverinë “Rama”, sipas opinionit tuaj, sepse atje janë edhe ministrat tuaj, besoj se e bëni një analizë të punës së qeverisë?

Besoj se sot nuk jemi mbledhur për të bërë një analizë të punës së qeverisë…

Në opinionin tuaj si po funksionon…

… dhe nuk mund ta bëj në mënyrë të nxituar. Unë mendoj se qeveria në tërësi përpiqet të përmbushë angazhimet e saj. Unë gjithmonë kam qenë dhe mbetem partizani i vetpërmirësimit çdo ditë, duke filluar me veten time, në detyrën time, apo si politikan në tërësi dhe me gjithë të tjerët.

Ajo që unë besoj se është më e rëndësishme në vendin tonë është të kuptojmë se nuk kemi kaq shumë energji për të harxhuar për konfliktet, që nuk na ndihmojnë t’i zgjidhim çështjet që ndihmojmë vendin dhe qytetarët tanë sot dhe në perspektivë dhe jemi vend shumë i vogël për të qenë në një luftë të pandalshme të vazhdueshme, mjaft të kushtueshme, e cila reflektohet shumë në shoqëri për shkak të politikës, pra nuk është një luftë që vjen nga poshtë, është një luftë që vjen nga lart, nga deklaratat….

…Për shembull, një deklaratë që qarkullon në media, ndoshta edhe në portalet që ju përmendët, është që ju nuk jeni dakord apo keni një opinion jo të mirë për punën e z. Tahiri, Ministrit të Brendshëm. Madje portalet shkojnë deri aty që mendojnë se një ndër arsyet e konfliktit midis jush dhe Ramës është pikërisht z. Tahiri…

Unë po të merresha me portale ndoshta nuk do të kisha ardhur fare këtu, në kuptimin që portalet atë histori kanë. Unë kam parë gjëra nga më të çuditshmet. Unë asnjëherë nuk shikoj probleme me individë, përkundrazi kam kohë që mbaj distancë nga raportet me individët. Të gjithë ata që mendojnë se mund të ndërtojnë debate mbi raporte individuale me mua janë të dështuar. Për mua është shumë e rëndësishme të tregohet pjekuri në respektimin e ligjit nga të gjithë dhe në mënyrë të barabartë.

Kemi hyrë në një fazë të re, kemi hyrë në një epokë të re. Në qoftë se duam të jemi vërtet të ndershëm me qytetarët shqiptarë, pra me reformën në drejtësi, kjo do të thotë që të gjithë, nga unë i pari, si Kryetar i Kuvendit, Presidenti i Republikës, Kryeministri dhe të gjithë të tjerët të japin shembullin e respektit ndaj institucioneve, respektit ndaj ligjit, moskeqpërdorimit të pushtetit për arsye politike, për arsye partiake. Nga kjo nuk janë të imunizuar as ministrat e LSI-së, nuk besoj se janë të imunizuar edhe ministrat e PS-së apo të kujtdo force politike nesër.

Në fakt, duket sikur mosmarrëveshjet që ju mund të keni pasur me Kryeministrin Rama, për të cilat spekulohet, le të themi, se i kanë shtuar këto zëra pikërisht një drekë që ju patët me z. Kokëdhima, me z. Mejdani, të cilët, në fakt, i përkasin një fronti anti-Ramë, le të themi, brenda së majtës…

Së pari, mendoj se nuk do të kisha dalë kurrë para gazetarëve në një konferencë shtypi me trajnerin tim, masazhatorin tim, siç ndodhi te Hotel “Grandi” përpara dy ditësh, sepse nuk do të ishte gjëja e duhur dhe e nevojshme.

Por isha vërtet i detyruar, pas keqkuptimeve të shkaktuara nga portalet dhe nga e gjithë politika e shpikjeve dhe e çudirave këtu për një drekë kaq misterioze, që zhvillohej në mes të Tiranës, në mes të Bllokut. Aty ku rrinë politikanët, ku rrinë gazetarët, ku rrinë edhe mediet, e cila nuk kishte asnjë lidhje me ato që janë raportuar.

Unë u detyrova ta bëj këtë gjë, sepse ndërkohë që unë isha në palestër u njoftova se gazetarët prisnin, sepse një takim përsëri i rëndësishëm imi me z. Kokëdhima, i cili banon aty afër Hotel “Grandit”, e përdorur si çdo njeri pranë shtëpisë së tij, që mund të përdorë një ambient për takime të ndryshme, po zhvillohej përsëri një takim tjetër. Nuk e di se çfarë politikanësh të tjerë kishte atje dhe u detyrova, sepse unë shkoj herë pas here në këto ambiente për t’u çlodhur, për t’u rikuperuar, për të bërë pak stërvitje. Sidomos tani që jemi pak më të lirë, dhe për të evituar çdo lloj keqkuptimi tjetër, ndërkohë që nuk e kuptoj pse duhet të konsiderohet si intrigë, se unë paskam qëndruar me ish-Presidentin Meidani, me të cilin qëndrojmë herë pas here apo edhe me sekretarin e Partisë Socialiste, z. Kokëdhima, një figurë publike, i cili nuk është në kërkim as nga Interpol-i, as nga Europoli dhe nga askush tjetër.

Jam shumë i zhgënjyer nga fakti që ka pasur një vrer nga segmente mediatike ndaj ish-Presidentit Meidani, që unë do ta konsideroja një turp të madh. Nuk e di, ato replikat me djalin e tij janë një çështje tjetër, nuk hyj në këto raporte për arsye se unë mendoj që ish-Presidenti Meidani është një figurë e rrallë për sa i takon integritetit që ka një figurë publike. Është një personalitet që i ka dhënë shumë politikës, nuk është një personalitet që ka marrë apo ka shpërdoruar angazhimin publik apo politik, është një figurë që i ka dhënë shumë Partisë Socialiste.

Unë kontaktin e parë politik me të e kam pasur përmes një përplasjeje, përmes një konkurrimi në vitin 1996. Ishte një situatë kritike në Partinë Socialiste: grupit pro-mocionit të Fatos Nanos, grupit kundër mocionit të Fatos Nanos. Unë isha kundër këtij mocioni, isha kandidati kryesor i këtij grupi për Sekretar të Përgjithshëm, ndërkohë që grupi tjetër nuk kishte asnjë kandidat që mund të më mundte mua, për arsye nga më të ndryshmet.

E vetmja figurë që u shpik ishte profesor Rexhep Meidani, i cili nuk kishte qenë as ndonjë anëtar i hershëm apo aktiv në Partinë Socialiste, ishte një figurë që i bashkonte të gjitha grupet e tjera ose nëngrupet e tjera te grupi i mocionit dhe që fitoi me dy vota. Unë mendoj se ishte një gjë shumë e mirë që ai e fitoi atëherë, sepse ndoshta po të kisha fituar unë Partia Socialiste, do të kishte shkuar drejt disa përplasjeve të parakohshme.

Ai luajti një rol shumë qetësues, stabilizues, është treguar jashtëzakonisht i duruar, jashtëzakonisht tolerant, ndërsa këto sulmet për ta denigruar apo nuk e di se për çfarë arsye, mendoj se janë të kota. Sepse unë mbaj mend në 14 shtator kur ai ishte President i Republikës dhe kur shumë ministra, zyrtarë fshiheshin dhe kishin frikë, nuk kishin as adresa dhe as telefonat nuk i mbanin hapur, ai ishte në krye të detyrës. Ishte mjaft kurajoz dhe ishte pika kryesore e kontaktit të gjithë partnerëve ndërkombëtarë në ato orë të rënies, për fat të keq, të shtetit.

A keni ndonjë ide, përse e godasin Meidanin dhe kush e bën këtë?

Unë nuk e di. Mund t’ju them këtë gjë: kam marrë një gazetar të njohur, që ka qenë edhe ai i përfshirë në çmontimin e këtij puçi që Meta – Meidani – Kokëdhima, ku di unë se çfarë po bënin.

Do t’ju them se një nga arsyet pse u takova me ish-Presidentin Meidani, e kishim lënë prej kohësh, mora dhe i sqarova se kjo që ka ndodhur është një gjë krejtësisht e rastësishme, madje ne e kishim lënë drekën te “Rogner”-i, por unë për të evituar çdo lloj keqkuptimi mediatik propozova te “Grand”-i . Aty për çudi qëlloi edhe z. Koço, i cili erdhi në mënyrë të paparashikuar dhe natyrisht që është edhe një mik, koleg, plus që janë të shkencave të sakta të dy bashkë me profesorin. Ai ndenji një farë kohe, qëlloi aty dhe vazhdoi. Ka bërë një komunikim me mediat, sepse ato kanë qenë aty duke e pritur, punë e tij.

Pra, unë nuk e kuptoj pse duhet të sulmohet: do të bëhet qeveri teknike, nuk do të bëhet qeveri teknike! Si mund të bëhet qeveri teknike pa Partinë Socialiste? Qeveri teknike do të thotë që të gjitha palët bien dakord që për një periudhë 45-ditore apo tremujore të krijohet një qeveri mirëbesimi për të realizuar një, dy, tre, katër objektiva.

Për më tepër nuk mendoj që profesor Meidani dhe askush që e njeh atë, jam i bindur nuk beson kurrë që është një figurë që do të hynte në lojëra të tilla. Më duket një përpjekje për të cenuar çdo figurë, çdo personalitet me vend dhe pa vend. Unë mendoj se ai është një ikonë e integritetit të një personaliteti publik, është një figurë që ka qenë një President shembullor, me mjaft integritet dhe që i ka dhënë dhe i jep politikës. Nuk është nga ata që merr, që rrëmben, që plaçkit dhe që e meriton të sulmohet në një mënyrë të paprinciptë.

Qëndrimi juaj duket i qartë, i prerë për z. Meidani, por…

Nuk e kuptoj të gjithë këtë histori. Pse duhet keqinterpretuar dhe duhet krijuar tym për gjëra kot. Unë gjithë kohës jam në takime me politikanë aktivë.

Po, por me z. Kokëdhima nuk jeni takuar kaq shpesh më parë, në momentin që ai ka qenë deputet i Partisë Socialiste dhe shumë pranë Edi Ramës. Interpretohet sikur është një afrim tani që ai nuk është më deputet dhe jo më mik me Ramën…

Së pari, një herë mos harroni që z. Kokëdhima ka qenë një nga partizanët më të flaktë të koalicionit PS-LSI. Ka qenë një nga njerëzit më të angazhuar dhe për të krijuar një klimë të re të raporteve midis meje dhe z. Rama. Z. Kokëdhima, e thashë, nuk është në kërkim as nga Europoli, as nga Interpol-i, nga askush tjetër. Ai është një figurë e njohur, ka njerëz të cilët e pëlqejnë, ka njerëz të cilët mund të mos e pëlqejnë, siç është rasti im, siç është rasti i shumë figurave publike. Është një intelektual dhe në çdo rast është kënaqësi të bisedosh, të debatosh me të.

Unë kam qenë i detyruar të jap dy-tri sqarime, sepse i kishin dhënë shumë dezinformacione, sikur unë kisha punuar në Gjykatë Kushtetuese, që z. Kokëdhima të humbiste mandatin, që nuk e kuptoj pse duhet të harxhoheshin kaq shumë energji për një gjë të tillë.

Në rast se ju do të kishit pyetje pse, unë jam takuar kaq shpesh këto kohët e fundit…

Këto kohë, po…

Ai është i bindur se unë për asnjë arsye nuk kisha pse të kisha angazhime të tilla. Por nuk është thjesht kjo arsyeja. Unë takohem me çdo njeri që e njoh, që më njeh dhe nuk e kuptoj pse duhet të përbëjë ky takim një shqetësim.

Aq më tepër që është një figurë kryesore e Partisë Socialiste, është zgjedhur sekretar për disa çështje: për reformimin, për emigracionin e kështu me radhë.

Dakord, por nuk është më deputet i Partisë Socialiste, i është hequr mandati dhe duket sikur nuk ka më kreditet që kishte, dikur quhej edhe pashai i Jugut…

Po mirë, edhe z. Beqaj iu hoq mandati, më pas u bë ministër. Edhe këtij iu hoq mandati. Nuk ka ndonjë lidhje pse iu hoq mandati, ai e ka respektuar vendimin e Gjykatës Kushtetuese, ne e kemi respektuar. Kjo tregon se gjykatat respektohen në këtë vend. Këtu nuk ka asnjë gjë të keqe. Në qoftë se hiqet mandati, ne nuk do ta izolojmë këtë.

Flasim pak për marrëdhënien me z. Rama. Në fakt, u duk sikur kishte pak tension, sidomos ditën e miratimit të reformës. Mediat interpretuan momentin kur ju largoheni teksa z. Rama fliste dhe më pas vini kur z. Rama mbaron…

Dua t’ju sqaroj për këtë çështje. Kjo nuk ka lidhje kjo me faktin që ishte një qëndrim ndaj z. Rama. Unë kam dëgjuar një pjesë të fjalës dhe më pas jam larguar për një arsye shumë të thjeshtë: kam qenë mjaft i lodhur, i dërrmuar, gjithë ato ditë dhe net, arsyeja ka qenë se votimi ka qenë shumë i rëndësishëm. Menjëherë pas z. Rama ne do të fillonim votimin. Unë jam këshilluar me këshilltarët e mi për mënyrën se si do të procedohej, sepse kuptohet një gabim i vogël në një moment të tillë është me pasoja. Kështu që kjo nuk ka asnjë lidhje me këtë çështje.

Gjithsesi, pas kësaj marrëdhënieje, që nga mediet, të paktën, u interpretua si marrëdhënie pak e ngrirë, vjen një takim në vilën qeveritare në datën 3 gusht, në mos gaboj, mes jush dhe z. Rama. U shkrin akujt apo ishte një takim rutinë?

Mendoj se ishte takim normal. Prapë është media vetë që nuk e di pse ngarkohet, pse mobilizohet…

Aq më tepër që është përsëri z. Nard Koka, si herën e parë, në Gjirin e Lalzit, ku keni ngrënë një drekë me ngjala me z. Rama, edhe kësaj here. Është koincidencë, apo..?

Nuk ka pasur ngjala, ngjala ishte fjala, nuk ishte menyja e vërtetë.

E dyta, nuk ka nevojë për t’u takuar me z. Rama për të pasur ndërmjetës, sepse unë mendoj se ne kemi një komunikim normal në përgjithësi. Për çështjen e reformës unë kam qenë gjithmonë i palëvizshëm dhe vetëm me një skenar, me skenarin A: konsensus-Venecia; Venecia-konsensus.

Nëse opozita, ku e di unë, për çdo lloj arsye, nuk donte të merrte pjesë e të tjerë, kjo ishte një e drejtë e saj. Do të ishte një gabim shumë herë më i rëndë se ai që bëri me reformën administrative-territoriale, sot do të kishim probleme shumë më të mëdha edhe për vetë zbatimin e reformës e kështu me radhë.

Më lejoni t’ju pyes: edhe në datën 3 për reformën folët sërish, apo pati edhe biseda të koalicionit?

Kemi folur edhe për reformën, sepse kemi qenë në momentin e përcaktimit të kalendarit për ligjet, sesi do të procedohet për ligjin e Vetingut, disa ligje të tjera deri më 30 gusht dhe të tjerët menjëherë pas 30 gushtit. Pra, kjo ka qenë ecuria e vazhdimit të ligjeve që plotësojnë dhe ndihmojnë në zbatimin e reformës, por edhe çështje të tjera normale.

Për z. Basha thatë se ndryshuat mendim duke parë performancën e tij, sidomos te ligjet…

Nuk duhet të ngatërrojmë mendimin tim për z. Basha, si kryetar i Partisë Demokratike. Unë po flas për reformën dhe për reformën që nga momenti që jam takuar me të.

Unë nuk e di, ndoshta më parë mund të ketë pasur qëndrime të tjera. Këtë gjë nuk e di. Nga ai moment deri në fund, ai ka qëndruar në pozita, sipas mendimit tim, konstruktive.

Edhe me z. Berisha keni thënë se keni kontaktuar…

Kam folur një herë dy ditë para miratimit të reformës. Nuk e kisha edhe numrin e tij, jo se e kisha fshirë, por kam pasur një problem me celularin dhe…

Po ju keni shtëpitë pranë te Gjiri i Lalzit, kam idenë…

Po ç’lidhje ka kjo me këtë gjë? Ndonjëherë përshëndetemi, patjetër.

Pra, keni folur vetëm një herë më parë?

Po, për këtë rast kemi folur vetëm një herë pas kaq kohësh, numrin e tij ma dha z. Bylykbashi. Ka qenë një bisedë korrekte, sepse edhe unë kisha një ide, sepse ishte krijuar një legjendë që e pengon Berisha. Ai ka qenë tepër i qartë dhe konstruktiv, ata kanë qëndruar në të drejtën e tyre dhe kaq.

Duke qenë se ju keni punuar me z. Berisha, kam parasysh të gjithë qëndrimet dhe deklaratat tuaja për këtë, jeni i bindur se z. Berisha nuk ka qenë pengues për sa i përket reformës? Ose më saktë të themi ndikues te z. Basha për reformën në drejtësi për disa momente të caktuara?

Duhet të ndajmë disa gjëra. Unë nuk jam angazhuar në diskutime me Partinë Demokratike nga fillimi i reformës deri në ditën që u takuam me z. Basha. Unë e kam theksuar gjithmonë domosdoshmërinë e miratimit me konsensus, pasojat që do të vinin nga mungesa e konsensusit, kam debatuar shumë edhe me përfaqësues ndërkombëtarë, të cilët mund të kenë vënë theksin te 93 apo 94 vota, duke iu bërë të qartë se nuk është kjo zgjidhja, aq më tepër që flasim edhe për integrimin europian të Shqipërisë.

Në qoftë se ty opozita zyrtare të del nga Parlamenti dhe ndërpritet dialogu politik, është një marrëzi të mendosh që do të ketë një rekomandim pozitiv apo do të ketë çelje të negociatave, sepse kriteret e Kopenhagenit nuk mund të ribëhen vetëm për rastin e Shqipërisë dhe dialogu politik është një kriter i padiskutueshëm.

Jo vetëm kaq, unë kam thënë: a ka mundësi të më jepni një letër nga EPP-ja, që është partia kryesore e Parlamentit Europian, që e mbështet miratimin e reformës edhe pa PD-në dhe do të mbështesë edhe integrimin europian të Shqipërisë? Kur më kanë thënë: “Po këtë letër pse e do?” kam thënë: E dua këtë letër që t’ia tregoj edhe PD-së, që shikoni se edhe EPP-ja është për këtë gjë. Prandaj, hajdeni, merrni pjesë në këtë proces dhe mos u izoloni në këtë mënyrë. Pra, unë kam luftuar vazhdimisht, pa ditur se cili ishte qëndrimi i PD-së.

Ajo që mund të them për PD-në, është se ka hyrë me vonesë në proces dhe, natyrisht, ky ka qenë një gabim, megjithatë ka hyrë, por në momentin që ka hyrë, ka bërë një punë shumë të madhe voluminoze.

Ka një meritë, që e tha edhe Presidenti i Komisionit të Venecias, dhe unë e them jo se e tha Presidenti, por nga ajo që ne kemi gjykuar edhe me kolegë të tjerë, në përmirësimin e drafteve të para, në përafrimin e tyre sipas standardeve të Komisionit të Venecias, dhe kjo është një meritë e rëndësishme.

Ajo që dua t’ju them sot juve dhe të gjithë atyre që na dëgjojnë, bindja ime e plotë, që ua kam thënë të gjithëve, është që konsensusi është më i rëndësishëm se reforma.

Pse, do të thoni ju? Sepse Kushtetuta që ne kishim e vitit ‘98, me Kushtetutën që kemi sot, janë dy gjëra krejt të ndryshme. Unë do t’ju them se Kushtetuta e vitit ‘98 ishte shumë më e mirë se sa Kushtetuta që kemi sot. Kjo që kemi ne sot është një sforcim i madh që bëjmë, sepse ne jemi të detyruar, për shkak të ndikimit politik në drejtësi dhe në institucionet e pavarura, jo vetëm në drejtësi, por edhe në institucionet e pavarura, të bëjmë lëvizje të sforcuara, të krijojmë institucione të reja, të ndryshojmë deri diku edhe raportet që kanë të bëjnë me parimin shumë të rëndësishëm të Kushtetutës “check & balance” e kështu me radhë.

Po pse e bëjmë ne këtë? Sepse kjo Kushtetutë shumë e mirë nuk na ka funksionuar, se këto institucione janë mbushur me njerëz të gabuar, janë konsoliduar praktika të gabuara, ka politizim, korrupsion etj.

Atëherë, garancia më e madhe që po bëjmë sot për të çmontuar këtë sistem të politizuar, të korruptuar, të dështuar, jo të përgjegjshëm dhe jollogaridhënës e vetmja garanci që këto institucione që po krijojmë sot, është të krijohen në një mjedis më të përgjegjshëm politik, me më shumë mirëkuptim, që politika të qëndrojë më larg drejtësisë.

Sepse përndryshe, në rast se reforma në drejtësi do të shfrytëzohej, apo do të shfrytëzohet për të shtuar konfliktin në politikë, këto institucione do të politizohen, do të kontestohen dhe kjo reformë, që ne kemi përgjegjësi të madhe ta çojmë deri në fund në mënyrë të përgjegjshme, në mënyrë patriotike, do të thosha, që të konsolidohet një drejtësi e pavarur dhe efektive në vend. Në radhë të parë në interes të qytetarëve tanë, padyshim, që do të merremi me një faturë të madhe për një zhvillim shumë herë më të madh se sa sot. Prandaj e them gjithmonë që konsensusi është shumë i rëndësishëm për këtë gjë.

Është shumë e qartë në qëndrimet tuaja që në fillim për reformën. Ju i keni mëshuar fort konsensusit. Dua të flas për një tjetër…

Unë kam bërë të qartë që në rast se Partia Demokratike ka vendosur, këtë ia kam thënë edhe Partisë Demokratike, edhe z. Basha kur jemi takuar. Ia kam thënë edhe z. Berisha në bisedën që kam bërë, në qoftë se ata me çdo kusht do të nxirrnin një pretekst, përveç rekomandimit 88, që të mos votohej reforma, do të jepnin votat zemërthyer, siç thotë Doktori, në kuptimin që nuk do të ishte gjëja më e mirë për vendin.

Natyrisht, unë e kisha vendosur që nuk do të rrija më Kryetar i Kuvendit, sepse do ta konsideroja si një dështim, do të thosha, edhe të gjithë klasës politike aktuale, e cila ka mjaft përgjegjësi, por duhet të gjente forcën, siç e gjeti, për fat të mirë, ta kalonte këtë moment të rëndësishëm për vendin në një mënyrë të përgjegjshme dhe pozitive, edhe pse të sforcuar, por më mirë një sforcim për mirë sesa një sforcim për konflikt.

Një qëndrim që analistët e të gjitha krahëve e kanë vlerësuar, edhe ata që kanë qëndrime të kundërta me mënyrën se si ju bëni politikë, si funksionon LSI-ja, por në axhendën politike shqiptare është një moment shumë i rëndësishëm. Vitin që vjen është zgjedhja e Presidentit. Mendohet se është bërë një testim force brenda koalicionit, brenda politikës shqiptare, ai që do të kapte 71 vota në Parlament, ai ose do të jepte mocion votëbesimi për Kryeministrin, ose do të kërkonte mocion për largimin e Ramës si Kryeministër dhe duket se gurët e bardhë do t’i luante pikërisht ai kah që do të kishte 71 vota…

Mua kjo më duket një histori krejtësisht banale. Madje ia kam thënë edhe z. Rama, që nëse ke 71 vota, po t’i bëj edhe unë 3-4 vota, nuk ka asnjë problem, siç i kam thënë para një viti, që nëse nuk i pëlqen koalicioni me LSI-në, mund ta bëjë edhe me PD-në, apo me kë të dojë, dhe LSI-ja del në opozitë.

Nuk ka asnjë shqetësim, pra në kuptimin për t’i dhënë një përgjigje gjithë këtyre intrigave, sepse intriga do t’i quaja të gjitha këto.

Unë kam pasur shqetësim vetëm reformën. Kam dhënë një fjalë, që kjo do të mbyllej në datën 21 korrik. Kam dhënë me bindje, me konsensus, pavarësisht se deri në momentin e fundit kam pasur edhe një dyshim se mos Partia Demokratike do të nxirrte përsëri ndonjë gjë tjetër, që nuk e nxori, ajo kërkonte sigurinë e saj.

Mund t’jua sqaroj edhe juve, edhe qytetarëve: Partia Demokratike ishte dakord me zhbllokimin në rastin e emërimeve për përfaqësuesit nga Parlamenti për institucionet e reja të drejtësisë, ku Komisioni i Venecias thoshte se opozita duhet të ketë garanci të përfaqësimit, të përfshirjes së saj, jo me politikanë, por me ekspertë dhe me kritere të përcaktuara për pjesën që do të zgjidhte Parlamenti, sepse ne jemi Republikë Parlamentare. Opozita thoshte: zhbllokimit po, por zhbllokim me garantim, jo zhbllokim me përjashtim.

Ishte një formulë, që po të ishte në parlamentin danez, formula që i jepej opozitës ishte shumë i mirë, apo për parlamentin gjerman, ajo e votave të transferueshme, por për parlamentin tonë, që tani ka disa probleme, që ne i dimë, ajo mund ta linte, po themi, opozitën pa përfaqësi, sepse ky është parlamenti ynë, për fat të keq, në këtë rast. Për fat të mirë, që u bënë 140 vota, në rastin konkret. Kështu që opozita kërkonte garancitë e saj që kushdo që do të ishte në opozitë do t’i kërkonte, ndoshta do t’i kërkonte më me forcë se sa Partia Demokratike.

Qartë, por ky parlament sido që është me 140 vota, ky Parlament do të zgjedhë dhe Presidentin e ardhshëm. Z. Meta, do të kandidoni për President të Republikës?

Unë kam vetëm një kandidim përpara, atë për kryetar të Lëvizjes Socialiste për Integrim.

Për President të Republikës, e mendoni, apo do ta mendoni në një moment të dytë?

Ky nuk është një prioritet për mua. Unë nuk bëj asnjëherë zgjedhje personale, në kuptimin që si do të më bëjë mirë mua, absolutisht! Unë kam qenë Kryeministër, kam dhënë dorëheqjen nga Kryeministër, sepse Parlamenti Europian ka nxjerrë një rezolutë në vitin 2001, ku ka thënë që kjo shumicë, pra, shumica Nano-Meta në atë kohë, i ka votat legjitime për qeverinë, por nuk i ka legjitime për Presidentin.

Sepse ne morëm 87 apo 89 mandate, por 10 mandate i morëm në Dushk në balotazh, e cila nuk është se nuk ishte ligjore, sepse nuk ishte parashikuar në ligj kjo kleçkë, por nuk ishte e ndershme, sepse dëmtoheshin raportet e opozitës, normalisht se nuk do të merrnim 84. Mund t’ju them edhe këtë tjetrën që nuk kam pranuar as marrëveshjen që të bëhesha kryetar i PS-së, të bëhesha edhe Kryeministër dhe pastaj z. Nano të bëhej President, për arsye se kjo do të dëmtonte …

Ju është ofruar një marrëveshje e tillë?

Po, patjetër! Kjo dëmtonte interesin e vendit. Madje i kam thënë z. Nano: si mund të shkosh President atje tani me PD-në, me Berishën, përpara Presidencës, edhe me Doris Pack-un, eurodeputeten tonë të dashur, dhe me të gjithë eurodeputët e tjerë, duke thënë që ky është një president jolegjitim. Po bllokohet integrimi europian i Shqipërisë e të tjera, pastaj u bënë marrëveshje të tjera, u zgjodh Presidenti Moisiu, z. Nano u bë Kryeministër, unë u bëra Zv.kryeministër dhe Ministër i Jashtëm e kështu me radhë.

Pra, unë mendoj që çdo politikan duhet të shikojë si i bëhet më mirë vendit, nuk është problemi se si do të jetë më mirë për Ilir Metën, si do të jetë më mirë për dikë tjetër, ne kemi detyrime të japim zgjidhje sa më pozitive për vendin.

Dhe nëse do t’ju kandidonin për President, ju do ta shikonit këtë, për ta lënë postin e Kryetarit të Kuvendit për t’u bërë President?

Kjo është një çështje që nuk ja vlen fare të diskutohet, madje as te zgjedhjet e ardhshme nuk e kam e mendjen, në kuptimin sepse i shoh larg, pas një viti. Dje, pata një takim të mrekullueshëm me Zv.Kryeministrin dhe Ministrin e Jashtëm të Sllovakisë, z. Lajcak. E rëndësishme është që ta ruajmë këtë moment pozitiv, të mos harrojmë deklaratën e Departamentit Amerikan të Shtetit pas miratimit të reformës në drejtësi, që ky votim unanim, me konsensus ishte një tregues i bashkimit kombëtar. Të ecim në këtë linjë.

Në nëntor të marrim rekomandim pozitiv nga Komisioni Evropian; do të luftojmë ta marrim edhe nga këshilli i vendeve anëtare në dhjetor, pastaj ka kohë në janar dhe shkurt, por e rëndësishme është të ruajmë këtë proces pozitiv në rrugë konstruktive, sepse përndryshe do të jetë shumë vonë për vendin. Ne do të vazhdojmë me këto betejat tona absurde politike, por Shqipëria do të humbasë disa vite në procesin e integrimit.

Kemi humbur shumë, e thashë edhe në takimin që u bë për reformën në drejtësi, pra për miratimin e ndryshimeve kushtetuese. Gjithmonë më kujtohet, kur erdhi Romano Prodi në nëntor të 2001-it dhe tha: “Stabilitet, stabilitet, stabilitet”, atëherë Shqipëria ishte shumë përpara Serbisë dhe Malit të Zi. Tani ku është Serbia, ku është Mali i Zi? Janë shumë përpara nesh, kanë hapur negociatat, po ecin përpara. Ne s’kemi pasuar asnjë problem etnik, asnjë konflikt etnik e të tjerë, vetëm kemi këtë luftën politike, blloko këtej, blloko andej, duke nxjerrë njeri-tjetrin jashtë.

Meta, në qoftë se dikush nuk e njeh politikën në Shqipëri dhe ju dëgjon besoj se do t’i duket sikur jeni Presidenti i vendit. Ju jeni në një koalicion qeverisës, jeni Kryetar i Kuvendit…

Unë jam Kryetar i Kuvendit dhe përpiqem të flas si i tillë.

Kush është kundërshtari juaj politik, se duket sikur jeni me të tërë mirë, flisni mirë, keni një marrëdhënie shumë të edukuar kur flisni… Keni kundërshtar politik?

Jua thashë që s’kam kundërshtar, janë probleme të cilat janë kundërshtare të çdo qytetari shqiptar. Konflikti i panevojshëm është kundërshtar për ty. Unë nuk them të shuajmë debatin në politikë në Shqipëri, sepse ka nevojë për debat, por ka nevojë për debat të kualifikuar, ka nevojë për debat të përgjegjshëm dhe ka nevojë për zgjidhje nga të dyja palët, edhe nga qeveria, edhe nga opozita.

Pra, nuk ka nevojë vetëm debat që ky ka vjedhur kaq, ky ka vjedhur aq. Kush dëgjon këtu, më tha një kolegu im, që nuk ishte dakord me deklaratat e një ambasadori të nderuar, sepse thoshte që ka shkelur sovranitetin e vendit. Ishte edhe gazetar i njohur, opozitar është. I thashë: “Sovranitetin e vendit e shkelim ne çdo ditë”. Njëri thotë ky ka vjedhur 200 milionë euro, tjetri thotë ky ka vjedhur 300 milionë euro, tjetri thotë ky ka vrarë kaq, tjetri thotë aq, dhe të gjitha këto shkojnë nëpër ambasada, shkojnë jashtë. Sikur 1% e këtyre të jetë e vërtetë. do të mjaftonte për të nënçmuar politikanët e një vendi dhe institucionet e një vendi.

Nuk e harroj kurrë kur Shqipëria pritej të merrte ftesën për anëtarësim në NATO, një mik i huaj filloi, me idenë e mirë, që zgjidhini këto çështje tani, sepse ky është një moment historik. Po iku ky moment… Ai tha se kjo është si puna e avionit, që vjen këtu, të ulet, por po dëgjoi zhurmë poshtë, nuk e ka lënë mendja të ulet këtu në rrëmujë, do të iki. Nuk do t’ia dijë ai se kush e ka fajin. E ka Berisha, e ka Rama, e ka Meta apo kush e ka. Këtu është vend i pasigurt, vazhdojmë rrugën.

Ju mendoni se reforma në drejtësi, që ju e miratuat me një konsensus politik, se tani është në dorën e ekspertëve, do të arrijë të vendosë një drejtësi edhe në vertikalin shtetëror, duke ndëshkuar edhe të paprekshmit deri tani?

Unë besoj, patjetër. Këtë duhet ta ndihmojmë vetë ne politikanët, duke dhënë shembullin e parë për të respektuar institucionet për të mos ndërhyrë…

Ju jeni i vetmi që keni përmendur edhe burgun, më lejoni t’jua them këtë, disa herë thoni: kushdo të shkojë në burg. Mendoni se do të ketë penalitete kaq të ashpra me anë të zbatimit të kësaj reforme?

Po, patjetër, të ketë për cilindo që ka shkelur ligjin.

Le të flasim pak për trysninë e ndërkombëtarëve në reformën në drejtësi, u fol shumë prania e znj. Vlahutin, prania e ambasadorit Lu. Në opinionin tuaj si ka qenë prania e ndërkombëtarëve?

Angazhimi ndërkombëtar, në këtë klimë të brendshme jo shumë konstruktive të politikës sonë, ka qenë një shtysë e rëndësishme për ecurinë e reformës, për mbarëvajtjen e saj, e padyshim edhe për konsensusin.

Jo vetëm angazhimi i dy ambasadorëve të nderuara: ambasadorit të Shteteve të Bashkuara, Lu, dhe znj. Vlahutin si përfaqësuese e BE-së. Të mos harrojmë se angazhimi ishte në nivele shumë të larta. Sekretari Kerri dha një mesazh të qartë, Ndihmë Sekretarja për Europën, znj. Nuland, pati një rol shumë të rëndësishëm për konsensusin, në momentin që erdhi në Tiranë. Pas kësaj lindi ideja e propozimit hibrid. Komisioneri për Zgjerim, z. Hahn u përfshi vetë në sqarimin e dy-tre momenteve, që opozita kërkonte të identifikoheshin qartë.

Pra, pati angazhim shumë të madh, dhe unë mendoj se angazhimi i tyre mbetet tepër jetik edhe për zbatimin që do të vijojë. Kjo, mendoj unë, është një garanci për mbarëvajtjen e kësaj reforme.

Në fjalën e mëngjesit të 21 korrikut, ju thatë edhe për z. Lu, edhe për ambasadorët, që të mos dëgjojnë fjalë korridoresh, por le të ulemi e të gjejmë konsensusin…

Nuk e di se çfarë kam thënë, por mund t’ju them se raportin më të mirë me Ambasadorin Lu, ndoshta mund ta kem unë. Kjo për arsye se të gjitha çështjet që ai ka pasur prioritet në emër të Shteteve të Bashkuara, kanë merituar aprovimin e menjëhershëm nga ana ime, si për shembull çështja e dekriminalizimit. Asnjë parti si LSI, mendoj unë, nuk ka reaguar menjëherë, nuk ka qenë e ndjeshme kaq shumë dhe nuk ka pasur këtë angazhim që ka e që do ta thellojë, për të pasur përfaqësues me integritet në çdo nivel.

Nga Shtetet e Bashkuara dhe nga të gjithë partnerët është kërkuar, është bërë thirrje për transparencë në financimin e partive. LSI është e vetmja që e ka bërë që në nëntor. Shpresoj të vazhdojnë edhe partitë e tjera. Do ta thellojmë edhe më tej këtë çështje, sepse kemi edhe reformën zgjedhore, edhe për reformën në drejtësi, ku unë jam i bindur se qëndrimi i LSI-së ka qenë më i qarti dhe më i pandryshuari. Nuk ka pasur asnjëherë dhimbje koke nga LSI-ja, absolutisht.

Ju thatë se me z. Lu keni marrëdhënien më të mirë, por…

Në substancë, por unë nuk i ekspozoj shumë takimet me ambasadorët.

Ju shkoni më shpesh në Shtetet e Bashkuara. Ndoshta ekspozohet kjo anë në marrëdhëniet tuaja me Amerikën? Në krahasim me të tjerët, flas, me liderët këtu?

Të gjithë shkojnë në Shtetet e Bashkuara të Amerikës. Unë do të vazhdoj të shkoj edhe më shpesh. Mendoj se të gjitha këto u shërbejnë reformave që po zhvillohen në vend.

Kur do të mblidhet Parlamenti, z. Meta?

Lidhur me këtë pyetje, aktualisht deputetët opozitarë, përfaqësuesit e Partisë Demokratike kanë paraqitur pikëpamjen e tyre për ligjin për Vetingun. Besoj se së shpejti do të ketë përsëri një seancë tjetër të komisionit, për të paraqitur pikëpamjet e tyre dhe për ligjet e tjera.

Do ta sqaroj pak si procedurë, edhe për opinionin. Ndërkohë presim që këto mendime dhe këto ide të vlerësohen nga ekspertët ndërkombëtarë. Presim përgjigje deri nga data 15, për të parë se sa afër apo larg konsensusit dhe dakordimit me draftin apo draftet jemi, në mënyrë që të planifikojmë një seancë të suksesshme. Nuk është problemi të shkojmë në një seancë për të kundërshtuar njëri-tjetrin.

Ajo që unë vlerësoj, është se Partia Demokratike e vlerëson tani si proces ligjor, jo si proces politik. Debatet politike parimore u bënë deri më 21 korrik, për ndryshimet kushtetuese. Tani ne kemi Kushtetutën, kemi edhe rekomandimet e Venecias për çështje të caktuara, përfshirë edhe Vetingun. Ka një shqetësim, që është i drejtë, pse kjo çështje kërkon këmbëngulje për të ecur me konsensus.

Jo se janë të domosdoshme 140 vota apo nëntëdhjetë e ca vota, sepse maxhoranca i ka 84 vota në çdo rast, por në rast se opozita krijon bindjen, qoftë edhe për një nen të caktuar, që shkelet Kushtetuta, ajo mund ta çojë çështjen në Gjykatë Kushtetuese, mund ta çojë në Komisionin e Venecias, dhe nëse mbas një farë kohe një ligj i tillë dështon, do të ishte një dështim apo vonesë e pashpjegueshme e gjithë reformës.

Kjo është arsyeja që ne punojmë me shumë qetësi, në mënyrë konstruktive dhe jemi në lidhje të ngushtë edhe me Shtetet e Bashkuara të Amerikës, edhe me Bashkimin Europian, për të ecur me sukses, sepse janë shtatë ligje shumë të rëndësishme, por janë edhe shumë ligje të tjera, janë rreth dyzet në total, të cilat duhet të jenë mjaft solide.

A do të ketë kohë dhe hapësirë kushtetuese për shqetësimin që ka ngritur sot Presidenti i Republikës, në lidhje me pikën 5 të nenit 149, pika “ç”, që thotë: “Kritere të tjera për shkallën e kualifikimit të kandidatëve që marrin pjesë në short”, që parashikohet me ligj, flitet për ligjin e emërimeve në drejtësi. Këto rregullohen me ligj. A do të kenë afatin e duhur?

Ne jemi në komunikim me Presidentin e Republikës. Unë e përshëndes angazhimin e tij për të respektuar të gjitha detyrimet kushtetuese që ai ka si institucione për reformën. Kjo dalje kërkon këtë përgjegjshmëri dhe frymë bashkëpunimi. Ne do të përpiqemi të plotësojmë të gjitha detyrimet që ka Kuvendi, në një proces konstruktiv.

Pyetja e fundit: nëse zgjedhjet do të ishin nesër, do të ishit në koalicion me Partinë Socialiste apo me Partinë Demokratike? Pra, me PS-në e Edi Ramës apo me PD-në e Lulzim Bashës?

Shiko, këto partitë nuk do të kisha dëshirë t’i individualizoja, sepse ne duhet të ecim drejt konsolidimit të partive si institucione të një politike të re, të përgjegjshme, transparente, konstruktive.

Ne jemi një koalicion, që unë do të thosha se është një koalicion që funksionon në mënyrë mjaft konstruktive po sipas mendimit tim, dhe do të vazhdojmë t’i përmbushim të gjitha detyrimet tona, si takimet për reformën në drejtësi apo çështje të tjera që i konsiderojmë si çështje të interesit kombëtar.

Mund të dalin edhe çështje të tjera, që kanë të bëjnë me 5 prioritetet kyçe e kështu me radhë. Këto nuk duhen keqkuptuar.