Transmetuar më 05-07-2016, 10:43

Tiranë, 4 korrik 2016, NOA.al- Presidenti Bujar Nishani ka uruar gjithë besimtarët myslimanë me rastin e festës së Fitër Bajramit.

Ai thotë në urimin e tij se kjo ditë shërben për të larguar urrejtjen, ndasitë dhe përçarjet e panevojshme dhe për t’i afruar më shumë njerëzit me njeri tjetrin.

Kreu i shtetit shprehet se pas agjërimit njëmujor të atyre kurorëzon përpjekjet e frytshme të atyre që besojnë në mësimet e shenjta dhe fuqinë e Krijuesit, ia kanë dalë mbanë të jenë bërë më të virtytshëm, më të mëshirshëm dhe më zemërgjerë.

“Në këtë ditë të madhërishme, sidomos pas gjithë asaj sakrifice, ju dëshiroj shëndet, begati, ndriçim të shpirtit dhe kthjellim të mendjes, zemërgjerësi dhe sa më tepër respekt për më të pafatët e për ata që janë ndryshe”, shprehet Nishani.

Mesazhi i plotë i Nishanit:

Kjo ditë e shenjtë na shërben të gjithëve për të larguar nga vetja urrejtjen, ndasitë dhe përçarjet e panevojshme duke na afruar edhe më tepër me njëri-tjetrin, duke na shtuar dashurinë për bashkatdhetarët si dhe duke na ripërtërirë virtytet, besimin dhe paqtimin.

Pas ditëve fort të mundimshme të agjërimit, por njëkohësisht të sprovës e të konsolidimit të besimit që keni kaluar gjatë Ramazanit, Festa e madhërishme e Fiter Bajramit kurorëzon përpjekjet e frytshme të atyre që besojnë në mësimet e shenjta dhe fuqinë e Krijuesit, të atyre që pasi kanë përshkuar udhëtimin shpirtëror njëmujor, ia kanë dalë mbanë të jenë bërë më të virtytshëm, më të mëshirshëm dhe më zemërgjerë.

Kjo Festë e madhe na mbush të gjithëve me pak më shumë shpresë, me shumë më tepër vullnet për të dhënë e për t’iu gjendur më afër të sëmurëve, fatkeqëve, të vobektëve si dhe atyre të cilët jeta nuk i ka trajtuar edhe me aq mëshirë apo begati.

Prandaj në këtë ditë të madhërishme, sidomos pas gjithë asaj sakrifice, ju dëshiroj shëndet, begati, ndriçim të shpirtit dhe kthjellim të mendjes, zemërgjerësi dhe sa më tepër respekt për më të pafatët e për ata që janë ndryshe.

Nga zemra ju uroj të gjithëve: besimtarë myslimanë dhe jo myslimanët, të cilët në respekt të tjetrit dhe për të mirën e vetes, mbajnë Ramazanin dhe respektojnë Bajramin.

Gëzuar dhe për shumë vjet Fitër Bajramin!”/a.y/noa.al

Komentoni mbi këtë lajm më poshtë